खोज

समाचार सारांश

• ---

  लुम्बिनी प्रदेश सरकारले पश्चिम नवलपरासीमा सबै परिवारको स्वास्थ्य विवरण समेटेर मोबाइल एप्लिकेशनमा पारिवारिक स्वास्थ्य प्रोफाइल बनाउने काम सुरु गर्यो।

  

• मातृ मृत्युदर घटाउने, कुपोषण न्यूनीकरण गर्ने, खोप कार्यक्रम अभिवृद्धि गर्ने र स्वास्थ्य सेवा सहज बनाउने लक्ष्य राखिएको छ।

• स्वास्थ्य प्रोफाइल मार्फत खोप, गर्भ परीक्षण लगायतका स्वास्थ्य सेवा सम्बन्धी सूचना मोबाइल एसएमएसमार्फत आम नागरिकलाई दिने व्यवस्था गरिनेछ।

  ---

सुनवल, १७ साउन ।

लुम्बिनी प्रदेश सरकारले पश्चिम नवलपरासीमा समुदाय स्तरमा पारिवारिक स्वास्थ्य प्रोफाइल बनाउने काम सुरु गरेको छ ।

जिल्लाभरका सबै परिवारको स्वास्थ्यसँग सम्बन्धित विस्तृत विवरण मोबाइल एप्लिकेशनमा समाविष्ट गरेर स्वास्थ्य सम्बन्धी जानकारी दिने र प्रविधिको उपयोग गरी सहज सेवा प्रदानका लागि उक्त प्रोफाइल निर्माण थालिएको हो ।

लुम्बिनी प्रदेशका स्वास्थ्य मन्त्री खेमबहादुर सारुले स्वास्थ्य प्रोफाइल निर्माण कार्यक्रमको शुभारम्भ गर्दे मातृ मृत्युदर घटाउन, कुपोषण न्यूनीकरण, खोप कार्यक्रम अभिवृद्धि गर्ने लगायतका कार्यका लागि पारिवारिक स्वास्थ्य प्रोफाईलले सहयोग पुग्ने बताए ।

अझै पनि आधारभूत तहको स्वास्थ्य सेवा सुनिश्चित हुन नसकिरहेको अवस्थामा प्रदेश सरकारले समुदाय लक्षित र दिगो विकासको लक्ष्य पुरा गर्ने अठोटका साथ काम गरिरहेको मन्त्री सारुको भनाइ छ ।

उनले प्रदेश सरकारले स्वास्थ्य क्षेत्रमा महत्त्वपूर्ण उपलब्धि हासिल गरेको बताउँदै प्रदेशका सबै मन्त्रालय मध्ये सबैभन्दा बढी वित्तीय प्रगति गर्न सफल भएको पनि उल्लेख गरे ।

साथै जिल्ला अस्पताल र आधारभूत अस्पताल सम्म चिकित्सक पठाउने र दरबन्दी अनुसारको स्वास्थ्यकर्मी खटाउने गरी काम भइरहेको मन्त्री सारुले बताए ।

सो क्रममा नवलपरासीका स्थानीय तहका प्रमुखहरूले स्वास्थ्य सेवालाई प्रविधिमैत्री बनाउने कार्यले स्वास्थ्यमा पहुँच अभिवृद्धि गर्न सहयोग पुग्ने बताए । बर्दघाट नगरपालिकाका नगर प्रमुख शम्भुलाल श्रेष्ठले चिकित्सकको आवश्यक स्थानीय स्तरमा परिपूर्ति गर्न प्रदेश सरकारले ध्यान दिनुपर्नेमा जोड दिए ।

नगरपालिकाले स्वास्थ्यलाई विशेष प्राथमिकता दिएर बजेट व्यवस्थापन गरेको भए पनि माथिल्ला तहका सरकारले पर्याप्त सहयोग गर्नुपर्नेमा जोड दिए ।प्रतापपुर गाउँपालिकाका अध्यक्ष उमेशचन्द्र यादवले पालिका तहमा निर्माण भएका आधारभूत अस्पताल सञ्चालनमा ध्यान दिन ध्यानाकर्षण गराए ।

भवन मात्र बनाएर अस्पताल सञ्चालन गर्न नसकिने यादवको भनाइ थियो । सो क्रममा रामग्राम नगरपालिकाका उपप्रमुख सम्झना चौधरी, स्वास्थ्य निर्देशनालयका निर्देशक रोशनलाल चौधरी, युनिसेफ फिल्ड कार्यालय प्रमुख रिद्धि शर्मा, स्वास्थ्य कार्यालय नवलपरासीका प्रमुख अंगद बहादुर शाही, खोप अधिकृत भेषराज शर्मा लगायतले अभियानका सन्दर्भमा धारणा राखेका थिए ।

पारिवारिक स्वास्थ्य प्रोफाइलका निर्माणका लागि स्थानीय स्वास्थ्य संस्थाका कर्मचारी, महिला स्वास्थ्यस्वंयसेविका लगायतलाई अभिमुखीकरण प्रदान गरेर घर–घरमा पुगेर परिवारिक अवस्था समेटेर स्वास्थ्य प्रोफाइल तयार गरिने छ ।

उक्त प्रोफाइलका आधारमा खोप लगाउने, गर्भ जाँच गर्ने लगायतका स्वास्थ्य सम्बन्धी सम्पूर्ण क्रियाकलाप मोबाइल एसएमएसबाटै आम नागरिकलाई जानकारी गराउन सकिने स्वास्थ्य मन्त्रालयका सचिव दुर्गालक्ष्मी श्रेष्ठले बताइन । लुम्बिनी प्रदेशका पाल्पा, बाँके र अर्घाखाँचीमा यो कार्यक्रम यसअघि नै लागू भइसकेको छ ।