खोज

चन्द्रौटा(बुटवल टुडे), १७ साउन ।

मलाहा बिरालो संरक्षणको लागि चित्रकला प्रतियोगिता गरिएको छ । कपिलवस्तुको शिवराज नगरपालिका–१, शिवपुरमा रहेको शिवगढी इंग्लिस स्कूलमा शुक्रबार प्रतियोगिता गरिएको हो । पश्चिम तराई माछा मार्ने बिरालो संरक्षण परियोजनाको आयोजनामा भएको प्रतियोगितामा सोसियल इंग्लिस स्कूलकी समिक्ष परियार प्रथम भएकी छन् ।

  यस्तै सोही स्कूलका संजय पुन द्धितीय भएका छन्, भने श्री मा.वि. ईमिलियाका हिमाल सेन वली तृतीय भएको जनाईएको छ । त्यसैगरी समयथान मा.वि.का मेनुका सार्की सान्त्वना भएकी छन् । उनीहरुलाई डायरी र प्रमाणपत्र र ५ सय देखि २ हजारसम्म नगदसहित सम्मान गरिएको शिवगढी इंग्लिस स्कूलका कार्यक्रम संयोजक ज्योतिलाल भुसालले जनाए ।

जिल्लाको बुद्धभूमि र शिवराज नगरपालिकाका कक्षा ९–१२ का १० विद्यालयका २० जना छात्र–छात्राहरु प्रतियोगिता कार्यक्रममा भाग लिएका थिए । जसमध्ये प्रकृतिलाई थप सुन्दर बनाउने मलाहा बिरालो किसनाले पालेका पोखरीको माछा खाएपनि सो बिरालोलाई कसरी संरक्षण गर्न सकिन्छ भन्ने चित्ररण हुनेगरी तस्बिर सहभागीहरुले कोरेको आयोजकले जनाएको छ ।

शिवगढी इंग्लिस स्कूलका प्रिन्सिपल टोयनाथ गैरेले यस क्षेत्रमा यस्तो कार्यक्रम पहिलोपटक गरिएकोले शिक्षण सिकाईमा प्रभावकारी टेवा पुग्ने बताए । विद्यार्थीहरुको चित्रकलामा निखारपन आउने भएकोले अगामी दिनमा यस्तो प्रतियोगिता आवश्यक रहेको जिकिर गरे । ४ दशकदेखि चित्रकला पेशा गर्दै आएका नारायण प्रसाद थारुले निर्णायकको भूमिका निर्वाह गरेको पश्चिम तराई माछा मार्ने बिरालो संरक्षण परियोजनाका संस्थापक गणेश पुरीले जानकारी दिए ।