खोज

बुटवल, १७ साउन ।

होटल तथा रेष्टुरेन्ट व्यवसायी संघ, रुपन्देहीले कार्यसमिति सदस्य तथा पूर्वअध्यक्षहरूलाई लक्षित गरी एक दिने टिम बिल्डिङ तालिम आयोजना गरेको छ । शनिबार सम्पन्न तालिम व्यक्तिगत र संस्थागत विकास गर्ने उद्देश्यका साथ आयोजना गरिएको हो ।

लुम्बिनी प्रदेशका शिक्षाविद् दल बहादुर गुरुङले तालिमको सहजिकरण्ण गर्दै सेवामुखी ब्यवसाय होटलहरु खानाका परिकार र सेवामा मुख्य ध्यान दिनुपर्ने बताए । संस्थाको सफलता र असफलतामा सधै नेतृत्व जिम्मेबार रहने भन्दै आफुभित्रका सबल पक्ष, सुधार, अवसर र चुनौतीका बारेमा बुझन र आफना सदस्यहरुलाई बुझाउन जरुरी रहेको उनले औल्याए । तालिममा जिम्मेवारी, नेतृत्व र संगठनसंगै संस्कार तथा संस्कृतिका विषयमा समृद्ध विचार आदानप्रदान गरिएको थियो ।

आगामी वर्षमा संघबाट वार्षिक कार्ययोजना अनुसार विविध कार्यक्रम गर्ने समेत भएको छ । संघका अध्यक्ष माधव प्रसाद खनालले सडक तथा पार्क खाना महोत्सव, खानाका परिकार र त्यसको महत्वसम्बन्धी गोष्ठी, यातायात र होटल व्यवसायबीच मैत्रीपूर्ण खेलकुद कार्यक्रम, होटल व्यवसायी र किसानबीच उत्पादन तथा उपभोग्य सामग्रीको सम्बन्धबारे लघु अध्ययन र भ्रमण, बुटवलको पहिचान झल्किने “खानामा ब्रान्ड” विकास, पोषण शिक्षासम्बन्धी जनचेतनामूलक कार्यक्रम तथा त्रैमासिक बुलेटिन प्रकाशन जस्ता रचनात्मक कार्यक्रमहरुलाई प्राथमिकतामा राखेर अघि बढ्ने बताए ।

तालिमको संयोजन संघका कार्यक्रम संयोजक बाबुराम अर्यालले ब्यक्तिगत र संस्थागत नेतृत्व विकास र सिकाईमा तालिमको महत्व रहने भन्दै समयसापेक्ष तालिमलाई निरन्तरता दिने बताए ।

आगामी दिनमा होटल व्यवसाय क्षेत्रलाई संगठित, प्रतिस्पर्धी र पर्यटकमैत्री बनाउने रणनीतिमा कार्य अघि बढाउने संघका महासचिव केशव राज कंडेलले बताए ।