खोज

दाङ,१६ साउन ।

तुलसीपुर उपमहानगरपालिका–१५ की अन्जना चौधरी हाल कक्षा १२ को परीक्षा दिएर बसेकी छिन्। उनी सृजनशील युवा क्लबकी अध्यक्ष पनि हुन्। पहिले कसैसँग खुलस्त बोल्न नसक्ने अन्जना अहिले आत्मविश्वासका साथ क्लबको नेतृत्व गरिरहेकी छन्।

“पहिले म केवल किताबका पन्नामा सीमित थिएँ, अब समाज बुझ्न, जान्न र कुराकानी गर्न सक्ने भएकी छु,” उनले भनिन्। क्लबमा आबद्ध भएपछि विभिन्न तालिम र कार्यक्रममार्फत सामाजिक ज्ञान तथा व्यवहारिक सीप सिक्ने अवसर पाएको उनी बताउँछिन्।

त्यसैगरी, तुलसीपुर–१६ लक्ष्मीपुरकी सर्मिला चौधरी नवगठित नवजागरण युवा क्लबकी सदस्य हुन्। कक्षा ११ मा अध्ययनरत सर्मिला क्लबमा आवद्ध भएपछि बैठक सञ्चालन, सामाजिक नाटकमार्फत जनचेतना फैलाउने जस्ता सीप सिकेकी छिन्। उनले बालविवाहको रोकथाममा सक्रिय भूमिका निर्वाह गर्दै आएकी छन्। “बालविवाहले महिलाको स्वास्थ्यमा पर्ने असरबारे जनतालाई जानकारी दिन थालेकी छु,” उनले भनिन्।

लमही नगरपालिका–४ गुर्जिहवाकी अनुपा चौधरी गुर्जिहवा युवा क्लबकी उप–सचिव हुन्। उनले युवालाई देशको खम्बा मान्छिन्। “हामीले देशको नीति बुझ्नुपर्छ, त्यसमा सहभागी हुनुपर्छ,” उनी भन्छिन्। क्लबमार्फत उनले बालविवाह, दाइजो प्रथा, बोक्सी प्रथा लगायत सामाजिक कु प्रथाविरुद्ध खुलेर आवाज उठाइरहेकी छिन्। प्रत्येक महिना गाउँ–टोल सरसफाइ गर्ने अभियान क्लबमार्फत सञ्चालन गरिरहेको उनले जानकारी दिइन्।

यस्तै, घोराही उपमहानगरपालिका–१२ हापुरकी स्मृति भण्डारी पनि नेतृत्व विकासमा अग्रणी बनिरहेकी छन्। कक्षा १२ मा अध्ययनरत स्मृति हापुर मावि युवा क्लबकी सदस्य हुन्। “क्लबमा आबद्ध भएपछि आत्मविश्वास बढेको छ, अब देश र समाजका लागि केही गर्न सक्छु भन्ने विश्वास आइसकेको छ,” उनले भनिन्। क्लबमार्फत उनले बालविवाह रोकथाम लगायत सामाजिक मुद्दामा काम गरिरहेकी छन्।

युवाहरूको यस्तो सक्रियतालाई सशक्त बनाउने उद्देश्यले मुक्त कमलरी विकास मञ्चले ‘मुक्त कमलरी सशक्तिकरण परियोजना’ मार्फत नेतृत्व विकासमा विभिन्न कार्यक्रम गर्दै आएको छ। घोराही, तुलसीपुर र लमही नगरपालिकाका विभिन्न वडामा युवा क्लब गठन गरी युवालाई अधिकारको पैरवी गर्न सिकाएको मञ्चकी केन्द्रीय अध्यक्ष हिरामोती चौधरीले बताइन ।

किशोर–किशोरीलाई क्लबमा सहभागी गराई नेतृत्व विकासका कार्यक्रमहरू सञ्चालन गरिएको मञ्चले जनाएको छ। युवा नै देशका कर्णधार भएकाले उनीहरूको क्षमता विकास बिना समृद्धि सम्भव नभएको चौधरीले स्पष्ट पारिन ।