खोज

काठमाडौं, १६ साउन।

संयुक्त राज्य अमेरिकाको संघीय अदालतले नेपाल, होन्डुरस र निकारागुआका नागरिकले पाउँदै आएको अस्थायी सुरक्षा सुविधा टीपीएस कायम राख्न आदेश दिएको छ।

राष्ट्रपति डोनाल्ड ट्रम्पको प्रशासनले यसअघि नेपाली नागरिकको लागि टीपीएस सुविधा यही अगस्ट ५ मा समाप्त हुने जानकारी दिँदै स्वदेश फर्किन तयार हुन भनेको थियो। तर, सनफ्रान्सिस्कोस्थित संघीय अदालतकी जिल्ला न्यायाधीश ट्रिना एल थम्पसनले टीपीएस सुविधा अन्त्य नगरी अदालतको अन्तिम निर्णय नभएसम्म निरन्तर कायम राख्न आदेश दिएकी हुन्।

समाचार संस्था एपी का अनुसार, अब टीपीएस लिएका नागरिकहरूले अघिल्लै जस्तै अमेरिका भित्रै सुरक्षित रूपमा बस्न र काम गर्न पाउने छन्।

यस मुद्दाको अर्को सुनुवाइ नोभेम्बर १८ मा हुने छ।

अदालतले सरकारको निर्णयमा सम्बन्धित देशहरूको वर्तमान अवस्था पर्याप्त रूपमा मूल्याङ्कन नगरिएको भन्दै टीपीएस तुरुन्त खारेज गर्न नमिल्ने ठहर गरेको छ।

अहिले करिब ७ हजार नेपाली, ५१ हजार होन्डुरन र ३ हजार निकारागुआन नागरिकले टीपीएस सुविधा लिइरहेका छन्।

यसअघि ट्रम्प प्रशासनले अगस्ट ५ देखि नेपाली र सेप्टेम्बर ८ देखि होन्डुरस तथा निकारागुआका नागरिकहरूको टीपीएस सुविधा अन्त्य हुने घोषणा गरेको थियो।

टीपीएस सुविधा संरक्षणका लागि ‘नेसनल टीपीएस अलायन्स’ नामक वकालत समूहले अदालतमा मुद्दा दायर गरेको थियो। मुद्दामा, सामान्यतया टीपीएस लिने नागरिकले कम्तीमा १ वर्षको समय पाउने भए पनि नेपालीलाई केवल २ महिना मात्र समय दिइएको गुनासो गरिएको छ।