खोज

नवलपरासी, १६ साउन ।

पश्चिम नवलपरासीको बर्दघाटमा आज एक सय जनालाई लालपुर्जा बितरण गरिएको छ ।बर्दघाट नगरपालिका वडा नम्बर ५ मा रहेका अव्यवस्थित ,सुकुम्बासी हरूलाई दोस्रो चरण अन्तर्गतको पुर्जा वितरण गरिएको हो ।

बर्दघाट नगरपालिका–५ मा सम्पन्न दोस्रो चरणको पुर्जा वितरण कार्यक्रममार्फत ४ जना सुकुम्बासी र ९६ जना अव्यवस्थित सुकुम्बासीहरूले लालपुर्जा प्राप्त गरेका हुन्।

कार्यक्रममा प्रतिनिधि सभा सदस्य विनोद चौधरीले चुनावी प्रतिबद्धताहरू क्रमशः पूरा हुँदै गएको बताउँदै लालपुर्जा वितरणलाई आर्थिक सशक्तीकरणसँग जोडेर हेर्नुपर्ने धारणा राखे। जग्गाधनी प्रमाणपत्र आर्थिक विकासको आधार भएकाले पुर्जा पाउँदा आत्मविश्वास बढने बताए ।

नगरप्रमुख शम्भुलाल श्रेष्ठले भूमिहीन नागरिकलाई लालपुर्जा दिलाउने विषयमा भूमि आयोगसँग समन्वय गर्दै आएको जानकारी दिए। नापजाँचका लागि आवश्यक बजेट समेत विनियोजन गर्दै आएको बताए । यही कार्यकालमा सबैलाई भूस्वामित्व दिलाउने लक्ष्य रहेको श्रेष्ठले स्पष्ट पारे ।

भूमि आयोगका जिल्ला अध्यक्ष लाल बहादुर गुरुङले पुर्जा वितरण र जग्गा नापजाँचको प्रक्रिया तीव्र रूपमा अगाडि बढाइएको जानकारी दिए।

कार्यक्रममा स्थानीय जनप्रतिनिधि, लाभग्राही, सामाजिक अगुवा तथा नागरिकहरूको उल्लेखनीय उपस्थिति रहेको थियो।