खोज

भैरहवा, १६ साउन ।

लोकतान्त्रिक खेलकुद संघ, रूपन्देहीको नयाँ कार्यसमिति चयन भएको छ।

भैरहवामा आयोजित अधिवेशनबाट कमल जीसीको अध्यक्षतामा १७ सदस्यीय नयाँ कार्यसमिति निर्वाचित भएको संघले जनाएको छ। यसअघि क्रियाशील तदर्थ समितिका अधिकांश सदस्यहरू नै नयाँ कार्यसमितिमा दोहोरिएका छन्।

नयाँ कार्यसमितिमा रूपन्देही जिल्लाका अनुभवी तथा कीर्तिमानधारी खेलाडीहरूलाई समेटिएको छ। संघको उपाध्यक्षमा मुकेश कुंवर र खुश्बु चौधरी, सचिवमा दीपक काफ्ले, कोषाध्यक्षमा प्रियबन्धु न्यौपाने र सह–सचिवमा अर्जुन कुंवर चयन भएका छन्।

त्यस्तै, सदस्यहरूमा मोतिकला गुरुङ, सरस्वती लामगादे, नारायण थापा, रमेश पन्त, कपिल गौतम, बुद्ध महर्जन, रामप्रसाद कहार, सन्देश पोखरेल, विकास नारायण श्रेष्ठ, नीरज नारायण श्रेष्ठ र प्रभात गुरुङ निर्वाचित भएका छन्।

नवनिर्वाचित अध्यक्ष कमल जीसीले कार्यसमितिमा राष्ट्रिय तथा अन्तर्राष्ट्रिय स्तरमा प्रतिस्पर्धा गरिसकेका खेलाडीहरू समावेश भएकाले यसले संघलाई थप मजबुत बनाउने विश्वास व्यक्त गरे। “हामीले भैरहवामा विगतमा आयोजना गरिएका तर हाल हराएका खेल प्रतियोगिताहरूलाई पुनः सक्रिय बनाउनेछौं,” अध्यक्ष जीसीले भने, “प्रतिस्पर्धात्मक खेल संस्कृति विकासका लागि यो समितिको प्राथमिकता हुनेछ।”

कार्यक्रमका प्रमुख अतिथि तथा तरुण दल जिल्ला सभापति एवं सिद्धार्थनगर नगरपालिका–१३ का वडाध्यक्ष सोमबहादुर गुरुङले संघको कार्यसमिति उत्कृष्ट ढंगले चयन भएको उल्लेख गर्दै खेलकुदमार्फत युवाहरूलाई एकजुट गरेर समाज रूपान्तरणमा टेवा पुग्ने विश्वास व्यक्त गरे।

नेपाली कांग्रेसका नगर सभापति कोशिसबहादुर खड्काले आफू विगत ३० वर्षदेखि खेलकुदसँग आबद्ध रहेको जानकारी दिँदै लोकतान्त्रिक खेलकुद संघसँग सहकार्य गर्दै अघि बढ्ने प्रतिबद्धता जनाए। उनले जिल्लाका ख्यातिप्राप्त खेलाडीहरूको सहभागिता रहेको समितिले खेल विकासमा महत्वपूर्ण योगदान पुर्‍याउने अपेक्षा गरे।

अधिवेशनमा बोल्दै दीपेन्द्र बुढापृथीले पद प्राप्त गर्नु मात्र पर्याप्त नरहेको उल्लेख गर्दै आ–आफ्नो जिम्मेवारी पूरा गर्दै संघको विकासमा सक्रिय योगदान पुर्‍याउन सबैलाई आग्रह गरे।