खोज

कपिलवस्तु, १६ साउन  । 

नेपाली काँग्रेसका नेता एवं पूर्व सांसद अभिषेक प्रताप शाहले भारत–नेपाल सीमा क्षेत्रमा बढ्दै गइरहेका जबरजस्ती धर्म परिवर्तनका घटनालाई गम्भीरताको साथ लिएर दुई देशका सरकारले संयुक्त रूपमा छानबिन समिति गठन गर्नु पर्ने बताएका छन् ।

कपिलवस्तुको तौलिहवामा पत्रकार सम्मेलनको आयोजना गरेका उनले प्रेस विज्ञप्ति जारी गर्दै पछिल्ला दिनमा भारतीय सीमावर्ती जिल्ला बलरामपुरमा हिन्दु धर्मका महिलाहरूलाई विभिन्न प्रलोभन देखाई धर्म परिवर्तन गराइएको विषयमा भारतीय सञ्चारमाध्यममा दिएको आफ्नो अभिव्यक्तिलाई व्यक्तिगत विचारको रूपमा बुझन उनले आग्रह गरे ।

कुनै प्रतिष्ठित व्यक्तिलाई भन्दा पनि समग्र घटनालाई जोडेर आफूले सो बयान दिएको उनले प्रस्ट्याए  । भारतमा भएको घटनाले भारतमा मात्रै नभई नेपालमा समेत प्रभाव पारेको देखिएकाले धर्म परिवर्तनका घटना बारे नेपाल र भारत सरकारले संयुक्त रूपमा छानबिन समिति गठन गरी यस्ता अपराध न्यूनीकरणमा तत्परता देखाउन उनले माग गरे ।

नेपालको संविधानको दफा २६ को धार्मिक स्वतन्त्रता सम्बन्धी उपदफा ३ ले कसैको धर्ममा खलल पर्ने कार्य गर्न नहुने व्यवस्था गरेको भए पनि विभिन्न लोभ र प्रलोभनमा पारेर सोझा साझा जनताको धर्म परिवर्तन गराउने कार्य संविधानको पनि उल्लङ्घन भएको उनको ठम्याई थियो ।

उनले यस्ता कार्य नियन्त्रण गर्न नेपाल सरकारको ध्यानाकर्षण गराए । नेपाल भारत सीमा क्षेत्रमा मात्रै नभई पहाडी जिल्लामा समेत धर्म परिवर्तनको घटना हुँदै आएकाले राष्ट्रिय सुरक्षालाई दृष्टिगत गरी नेपाल सरकारले आवश्यक कारबाही गर्नु पर्ने उनको माग छ ।

जबरजस्ती धर्म परिवर्तन गराएकाहरूको पक्षमा र पीडितलाई न्याय दिलाउन आवश्यक सबै प्रक्रियामा आफ्नो साथ रहने उनको प्रतिबद्धता थियो ।

यस्तो छ प्रेस विज्ञप्ति