खोज

सुर्खेत,१६ साउन ।

वीरेन्द्रनगर नगरपालिकाले नगर क्षेत्रमा तीन सय बढी सिसि क्यामरा जडान गर्न लागेको छ ।

नगरपालिकाले नगरका विभिन्न क्षेत्रका ३ सय ५५ स्थानमा सीसी क्यामेरा जडानको प्रक्रिया थालेको छ । यसको लागि वीरेन्द्रनगर नगरपालिका, नेपाल टेलिकम प्रादेशिक कार्यालय सुर्खेत र जिल्ला प्रहरी कार्यालय सुर्खेतबीच त्रिपक्षीय सम्झौता पत्रमा हस्ताक्षर भएको नगर प्रमुख मोहन माया ढकालले जानकारी दिइन् ।

त्रिपक्षीय सम्झौता अनुसार पहिलो चरणमा ६ महिनाभित्र १ सय ५ स्थानमा सीसी क्यामेरा जडान गरी सञ्चालनमा ल्याइनेछ । दोस्रो चरणमा सुरक्षा संवेदनशीलतालाई मध्यनजर गर्दै थप २ सय ५० स्थानमा आवश्यकताका आधारमा यसै वर्षभित्र सीसी क्यामेरा जडान गरिनेछ ।

प्रदेश राजधानी वीरेन्द्रनगरमा बढ्दो जनसंख्याका कारण आपराधिक घटनाहरू दिनप्रतिदिन बढ्दै गएका छन् । त्यसैले वीरेन्द्रनगर नगरपालिकाले सुरक्षाको दृष्टिकोणले संवेदनशील मानिएका क्षेत्रहरूमा सीसी क्यामेरा जडानको प्रक्रिया सुरु गरे सँगै अपराध नियन्त्रण र शान्ति सुरक्षाका क्षेत्रमा प्रहरीलाई काम गर्न सहज हुने विश्वास गरिएको छ ।

त्रिपक्षीय समझदारी अनुसार टेलिकमले अप्टिकल फाइबर सहितको सीसी क्यामेरा र वाइफाइ हटस्पट जडान गर्नुपर्नेछ । यसरी जडान भएका क्यामेरालाई २४ सै घण्टा सञ्चालनमा ल्याउन टेलिकमले अप्टिकल फाइबर सहितको सेवा दिनुपर्नेछ ।

टेलिकमले हाललाई वीरेन्द्रनगर नगरपालिकाको प्रांगण र वडा नं. ६ र ८ स्थित घण्टा घरको प्रांगण वरिपरिका दुई स्थानमा वाइफाइ हटस्पट बनाउन इन्टरनेट जडान गर्ने गरी समझदारी पत्रमा हस्ताक्षर भएको छ । त्यस्तै, नगरका विभिन्न क्षेत्रमा जडान हुने सीसी क्यामेरा सञ्चालन तथा व्यवस्थापन नेपाल टेलिकमले आफ्नै फाइबरमार्फत गर्नेछ भने जिल्लाप्रहरी कार्यालय सुर्खेतले २४ सै घण्टा निगरानी गर्नेछ ।

नगरपालिकाले सञ्चालन, व्यवस्थापन तथा आवश्यक मर्मत सम्भार गर्ने छ । नगरपालिकाले चालु आर्थिक वर्षमा नगर क्षेत्रमा सीसी क्यामेरा जडानका लागि ११ लाख ६९ हजार बजेट व्यवस्थापन गरेको छ ।