खोज

• एकै सिजनमा सल्यान जिल्लाबाट ३ लाख ९३ हजार बिरुवा बिक्री ।

• ३ लाख २५ हजार ५५० बिरुवा अन्य जिल्लामा निर्यात ।

  

• बिरुवा बिक्रीबाट किसानहरूले २ करोड रुपैयाँभन्दा बढी आम्दानी गरेका छन् ।

सल्यान, १६ साउन ।

सल्यानका किसानले एकै सिजनमा झन्डै चार लाख फलफूलका बिरुवा उत्पादन गरेर बिक्री गरेका छन् । जसमध्ये सल्यानले तीन लाख २५ हजार बढी बिरुवा अन्य जिल्लामा निर्यात गरेको छ । बिरुवा बिक्रीबाट किसानहरूले मनग्ये आम्दानी समेत गर्दै आएका छन् ।

कृषि विकास कार्यालय सल्यानका अनुसार यस वर्षको सिजनको गत असार मसान्त सम्ममा मात्रै सुन्तला, कागती, ओखर र किवीका गरी तीन लाख ९३ हजार बिरुवा बिक्री गरेका छन् । बिरुवा बिक्रीबाट किसानको हातमा दुई करोड रुपैयाँभन्दा बढी रकम हात परेको छ ।

जिल्लाको बागचौर नगरपालिकाका–९ डाँगीगाउँका युवा कृषक निरज डिसीले गोल्डेन कृषि तथा पशुपक्षी फर्म दर्ता गरी व्यावसायिक नर्सरी सञ्चालन गर्दै आएका छन् । २६ वर्षीय निरजले एक सिजनमा मात्रै ३५ लाख बराबरको कारोबार गरेका छन् ।

उनले भने, ‘यो सिजनमा मात्रै ३५ लाखको कारोबार भयो । १० लाख जति खर्च भयो होला बाँकी २५ लाख चोखो आम्दानी हो ।’ टिमुर, कागती र सुन्तलाको नर्सरी सञ्चालन गर्दै आएका उनले कृषिलाई सम्मानित र मर्यादित पेसाका रूपमा लिन सके आर्थिक रूपमा सम्पन्न बन्न सकिने बताए ।

डाँगीगाउँकै २८ वर्षीय प्रदिपकुमार डाँगीले पनि एकै सिजनमा ४५ लाख बराबरको बिरुवा बिक्री गरेका छन् । सबै खर्च कटाए २२ लाख आम्दानी भएको प्रदीपको भनाइ छ । उनले भने, ‘गत वर्ष सबै खर्च कटाएर १३ लाख आम्दानी भएको थियो । यस वर्ष लागत बढी लाग्यो झन्डै १८ लाख बराबरको खर्च लाग्यो होला तर पनि २२ लाख आम्दानी भयो ।’

व्यावसायिक रूपमा नर्सरी सञ्चालन गरिरहेका करिब २५ जना किसानले उत्पादन गरेका बिरुवा जिल्ला र जिल्लाबाहिर बिक्री भएको कृषि विकास कार्यालयले जनाएको छ ।

५७ हजार चार सय ५० बिरुवा जिल्लामा खपत भएका छन् भने बाँकी तीन लाख २५ हजार पाँच सय ५० बिरुवा जिल्लाबाहिर निकासी भएको कार्यालयका सूचना अधिकारी ईश्वरीनारायण घर्तीले जानकारी दिए ।

सल्यानबाट जाजरकोट, कालीकोट, दैलेख, बाजुरा, अर्घाखाँची, पाल्पा, गुल्मी, स्याङ्जा, कास्कीलगायतका जिल्लामा विभिन्न प्रजातिका बिरुवा जाने गर्छन् । सबैभन्दा धेरै सुन्तलाका बिरुवाको माग हुने गरेको छ ।

जिल्लाभित्र ३४ लाख ३५ हजार तीन सय रुपैयाँ बराबर र जिल्लाबाहिर एक करोड ९४ लाख ६६ हजार सात सय रुपैयाँ बराबरका बिरुवा निकासी भएको सूचना अधिकारी घर्तीले जानकारी दिए । यसमध्ये करिब दुई लाखभन्दा बढी बिरुवा सुन्तलाका रहेका छन् ।

प्लास्टिक टनेल निर्माण, सिँचाइ पोखरी निर्माणलगायतका सहयोग नर्सरी व्यवसायीहरूलाई विभिन्न निकायहरूबाट हुँदै आएको छ । राष्ट्रिय कृषि आधुनिकीकरण कार्यक्रमले यस वर्ष पनि सुन्तला जातका फलफूल जोन कार्यक्रम सञ्चालन गर्ने भएको छ ।

जसका लागि अनुदान उपलब्ध गराउने कार्यका लागि सुचीकृत हुन आह्वान गरेको छ । बागचौर नगरपालिकाको ३, ७, ८, ९ र १० नं वडा तथा छत्रेश्वरी गाउँपालिकाको वडा नं. १, २ र ५, कुमाख गाउँपालिकाको ३ र ७ नं. वडा र सिद्धकुमाख गाउँपालिकाको ३, ४ र ५ नं. वडामा सुन्तला जात फलफूल जोन कार्यक्रम सञ्चालन हुनेछ ।