खोज

काठमाडौं, १५ साउन ।

बागमती प्रदेश सरकारका नवनियुक्त तीन मन्त्रीको शपथग्रहण कार्यक्रम अनिश्चितकालका लागि स्थगित भएको छ। आज दिउँसो १ बजेका लागि तय गरिएको शपथ समारोह अचानक प्रदेश प्रमुखको कार्यालयले रद्ध गरेको हो।

प्रदेश प्रमुखको कार्यालयद्वारा जारी विज्ञप्तिमा स्वास्थ्यमा समस्या देखिएपछि प्रमुख आजै काठमाडौं जानुपर्ने भएकाले शपथग्रहण कार्यक्रम अर्को सूचना नभएसम्मका लागि स्थगित गरिएको जनाइएको छ।

शपथ लिने तयारीमा रहेकी नवनियुक्त मन्त्रीहरूमा गोविन्द लम्साल (आन्तरिक मामिला तथा कानून), गीता गुरुङ (सहकारी तथा गरिबी निवारण)  र माया श्रेष्ठ (युवा तथा खेलकुद) रहेका छन्।

बागमती प्रदेशका मुख्यमन्त्री बहादुरसिंह लामाले आफूविरुद्ध आफ्नै पार्टी कांग्रेसका पाँच मन्त्रीले राजीनामा दिएपछि हिजो मात्रै नयाँ मन्त्रीहरूको नियुक्ति गरेका थिए।

हिजो नै शपथग्रहण गराउने तयारी भए पनि एमाले बागमती संसदीय दलका नेता जगन्नाथ थपलियाले फोनमार्फत कार्यक्रम रोक्न आग्रह गरेपछि स्थगित गरिएको थियो। त्यसपछि आजका लागि पुनः तय गरिएको शपथ कार्यक्रम पनि अब अनिश्चितकालका लागि रोकिएको हो।

यसबीच, हिजो बागमती कांग्रेस संसदीय दलमा भएको नेतृत्त्व चयनमा इन्द्रबहादुर बानियाँ विजयी भएका छन्। पराजित भएका मुख्यमन्त्री बहादुरसिंह लामाले भने पद नछाड्ने अडान लिएका छन्, जसले प्रदेश राजनीतिमा थप अन्योलता बढाएको छ।