खोज

लमही , १५ साउन ।

देउखुरी क्षेत्रको राजपुर गाउँपालिकामा सर्पको टोकाइबाट दुई जना घाइते भएका छन्। घाइतेहरूमा वडा नं. ४ फोहोरा निवासी ४ वर्षीय कार्तिक कुमाल र वडा नं. ५ की २५ वर्षीया बिन्दु यादव रहेका छन्।

ईलाका प्रहरी कार्यालय गढवाका प्रहरी प्रमुख डबल बहादुर बमका अनुसार बिहीवार बिहान करिब ७ बजे घरमै सुतेको अवस्थामा कार्तिक कुमाललाई विषालु सर्पले दाहिने हातको हत्केलामा डसेको थियो। उनलाई तत्काल लमहीस्थित सर्पदंश उपचार केन्द्र लगिएको भए पनि गम्भीर अवस्थामा रहेकाले थप उपचारका लागि घोराही रेफर गरिएको छ। हाल उनको राप्ती स्वास्थ्य विज्ञान प्रतिष्ठानमा उपचार भइरहेको छ।

यस्तै, बिन्दु यादवलाई बुधवार राति ११ बजे घरमै सर्पले दाहिने हातको बुढी औलामा डसेको थियो। उनलाई गढवा सर्पदंश उपचार केन्द्रमा लगिएको थियो। उनको स्वास्थ्य अवस्था हाल मध्यम रहेको प्रहरीले जनाएको छ ।

यसअघि पनि देउखुरीकै राजपुर र खरदरियामा सर्पको टोकाइबाट निवृत्त शिक्षक शालिकराम यादवको ज्यान गएको थियो।

सर्पदंशका घटनालाई मध्यनजर गर्दै देउखुरी क्षेत्रका दुई स्थानिय तह — लमही र गढवामा सर्पदंश उपचार केन्द्र सञ्चालनमा छन्। तर, गम्भीर प्रकृतिका बिरामीका लागि आवश्यक सुविधा जस्तै आइसियू र भेन्टिलेटर अभावले बिरामीलाई जिल्लाबाहिर रेफर गर्नुपर्ने बाध्यता रहेको स्थानीय पवन शर्मा रिजालले बताए।

उनका अनुसार देउखुरी क्षेत्रमा वार्षिक ५० भन्दा बढी बिरामीलाई आपतकालीन आइसीयू सेवा आवश्यक पर्ने गर्दछ । तर आवश्यक पूर्वाधारको कमीले अकालमै मृत्यु हुने घटना बढ्दै गएका छन्। त्यसैले स्थानीय तहहरू सर्पदंश उपचार सेवा सुदृढ गर्न गम्भीर हुनुपर्ने आवश्यकता देखिएको छ।

यसैबीच, लमही अस्पतालका स्वास्थ्य शाखा प्रमुख नारायण प्रसाद शर्माले अस्पतालमा सर्पदंशसम्बन्धी सबै उपचार सेवा उपलब्ध रहेको बताएका छन्।

सर्पले डसेका बिरामीलाई अन्यत्र नलगि सिधै लमही अस्पताल ल्याउन उनले आग्रह गरे। उनका अनुसार अस्पतालमा आवश्यक औषधि, एन्टी–भेनम, दक्ष स्वास्थ्यकर्मी तथा आपतकालीन सेवाहरू पूर्ण रूपमा उपलब्ध छन्। समयमै ल्याइएमा सर्पदंशबाट ज्यान बचाउन सकिने शर्माले स्पष्ट पारे।