पाल्पा, १५ साउन ।
रामपुर नगरपालिकाले स्थानीय पाठ्यक्रममा आधारित पाठ्यपुस्तक निर्माण गर्ने भएको छ । नगरपालिकाले स्थानीय स्तरमा रहेका विभिन्न विषयवस्तुलाई समेटेर पुस्तक तयार गर्न लागेको हो ।
नगरपालिकाले नगरभित्र रहेका धार्मिक, ऐतिहासिक, पुरातात्त्विक, आर्थिक, सामाजिक, पर्यटन, भूगोल लगायतका विषयलाई समेटेर हाम्रो रामपुर नामक पाठ्यपुस्तक निर्माण गर्ने भएको छ ।
पुस्तक तथा सन्दर्भ सामग्री निर्माणका लागि कार्यदल गठन गरी सूचना सङ्कलन कार्यशाला सम्पन्न गरेको छ । पुस्तक तथा सन्दर्भ सामग्री लेखन कार्यदलले नगरपालिका भित्रका १० वटै वडामा सूचना सङ्कलन कार्यशाला सम्पन्न गरेको छ ।
विद्यार्थीहरूलाई समग्र रामपुर नगरपालिकाको विषयमा जानकारी गराई पठनपाठनमा एकरूपता ल्याउनका लागि स्थानीय पाठ्यपुस्तक तथा सन्दर्भ सामग्री निर्माण गर्न लागिएको रामपुर नगरपालिकाका नगर प्रमुख रमण बहादुर थापाले बताए ।
विभिन्न देश र स्थानको बारेमा अध्ययन गरे पनि आफ्नै स्थानको बारेमा जान्न नसक्नु दुःखद पक्ष रहेको भन्दै नगरपालिकाको विषयमा जानकारी गराउन पाठ्यपुस्तक निर्माणको काम सुरु गरेको थापाले बताए ।
पुस्तक लेखनका लागि पहिलो चरणमा स्थानीय समुदायसँग सूचना सङ्कलनका लागि सबै वडामा कार्यशाला सम्पन्न गरेको र आगामी शैक्षिक सत्रबाट पाठ्यपुस्तक अध्यापन गर्ने तयारी रहेको थापाले जानकारी दिए ।
पाठ्यक्रम कार्यान्वयन र प्रभावकारी कक्षा शिक्षणका लागि पाठ्यपुस्तक सहित सन्दर्भ सामग्री निर्माण गर्न लागेको शिक्षा अधिकृत काफ्लेको भनाइ छ । कार्यदलले विभिन्न ८ वटा विषयवस्तुमा आधारित रहेर सुझाव सहित सूचना सङ्कलन गरेको छ ।
कार्यदलले प्रत्येक वडा तथा बस्तीको भूगोल र इतिहास, स्थानीय सरकार, सांस्कृतिक सम्पदा, वन वातावरण तथा सरसफाइ, स्थानीय आर्थिक विकासका आधार तथा पर्यटन , सामाजिक विकास, स्थानीय विकासका पूर्वाधार, विपद् व्यवस्थापन र सुरक्षा गरी ८ वटा विषयवस्तुमा आधारित रहेर सूचना सङ्कलन गरेको स्थानीय पाठ्यपुस्तक लेखन कार्यदलका संयोजक देवराज देवकोटाले बताए ।
२१ मंसिर २०८२, आइतबार
