खोज

बुटवल, १५ साउन ।

रुपन्देहीको तिलोत्तमास्थित डिंगरनगर दूरगामी बहुउद्देश्यीय सहकारी संस्थामा १२ करोड हिनामिना र २५ करोड रुपियाँ अपचलन भएको पुष्टी भएको छ । सहकारीमा नीतिगत अपचलन भने करिव ८५ करोड भएको देखिएको छ ।

सहकारीमा अपचलन भएपछि यसको सत्यतथ्य पत्ता लगाउन ७ जना स्वतन्त्र लेखापरीक्षकहरु दुई साता भन्दा अगाडिदेखि खटिएका थिए । उनीहरुले बुधबार अन्तिम रिपोर्ट तयार गर्दै कार्यसमितिलाई बुझाएका छन् ।

कार्यसमितिले उक्त अडिट रिपोर्ट प्रदेश सहकारी रजिष्टार कार्यालयमा पठाएको छ । अव प्रदेश सहकारी रजिष्टार कार्यालयले अडिट रिपोर्टको अध्ययन गरेपछि थप कारवाही अगाडि बढ्ने भएको छ ।

अडिट रिपोर्ट तयार भएपनि सार्वजनिक भने गरिएको छ । तर स्रोतका अनुसार रिपोर्टमा १२ करोड हिनामिना, २५ करोड अपचलन र ८५ करोडको हाराहारीमा नीतिगत अपचलन भएको पुष्टी भएको छ । स्वतन्त्र लेखा परीक्षक मध्येका एक सदस्यले नाम उल्लेख नगर्ने शर्तमा भने–“ठूलो रकम हिनामिना र अपचलन भएको देखिएको छ, तर हामीले रिपोर्ट सार्वजनिक गर्न मिलेन, हामीले कार्यसमितिलाई जस्ताको तस्तै प्रतिवेदन बुझाएका छौं ।”

सहकारीका अध्यक्ष घनश्याम तिवारी र सचिव रामबहादुर थापा क्षेत्री लामो समयदेखि फरार रहेकाले बचतकर्ताहरु अन्यौलमा परेका छन् । उनीहरुले आफूहरुको बचत फिर्ता गर्न माग गर्दै दिनहुँ प्रदर्शन गरिरहेका छन् ।

सहकारी अध्यक्ष तिवारीकी श्रीमती शारदा तिवारीले आफ्नै पहलमा करिब ७ करोड रुपैयाँ सहकारीमार्फत बचतकर्तालाई फिर्ता गराउने प्रस्ताव राखेपनि अन्तिममा त्यो भाँडिएको थियो । बुधबार सम्पन्न छलफलमा उनले आफ्नो तर्फबाट उक्त रकम जुटाउने र समन्वय समितिमार्फत वितरण गर्न तयार भएको बताएकी थिइन् । तर, शारदाको यो सहमति पछि उनका जेठाजु हरि तिवारीको असहमतिले सारा प्रक्रिया अवरुद्ध भएको समन्वय समितिका एक सदस्यले जानकारी दिएका छन् ।

“शारदाजीले सकारात्मक भूमिका खेल्दै रकम उपलब्ध गराउने वाचा गर्नुभएको थियो। तर अन्तिम निर्णयका लागि उनका जेठाजु हरि तिवारीको सहमति आवश्यक प¥यो। उहाँले समर्थन नगरेपछि सारा प्रक्रिया रोकियो,” समितिका एक सदस्यले भने । हरि तिवारी यसै संस्थाका सल्लाहकार पनि हुन् र पनि कार्यसमितिको मिटिङमा सहभागी हुन नमानेको सञ्चालकहरुको भनाई छ ।