खोज

• डिंगरनगर सहकारी संस्थाका अध्यक्ष घनश्याम तिवारी र सचिव रामबहादुर क्षेत्रीले करोडौं रकम अपचलन गरी फरार भएका छन् ।

• ठगिएका बचतकर्ताहरूले सहकारी कार्यालयमा घेराउ गर्दै निरन्तर दबाबमूलक आन्दोलन जारी राखेका छन् ।

  

• फरार अध्यक्ष तिवारीकी पत्नी शारदा तिवारीले आफ्नो तर्फबाट करिब ७ करोड रुपैयाँ फिर्ता गर्ने प्रस्ताव राखेकी थिइन् ।

• शारदा तिवारीको प्रस्तावमा उनका जेठाजु हरि तिवारीको असहमति भएपछि रकम फिर्ती प्रक्रिया अवरुद्ध भएको हो ।

बुटवल, १५ साउन ।

रुपन्देहीको तिलोत्तमास्थित डिंगरनगर दूरगामी बहुउद्देश्यीय सहकारी संस्थामा अध्यक्ष घनश्याम तिवारी र सचिव रामबहादुर क्षेत्रीले करोडौं रकम अपचलन गरेर फरार भएपछि तनाव झन् बढ्दै गएको छ । सहकारी घोटालाबाट पीडित भएका बचतकर्ताले कार्यालयमा घेराउ जारी राखेका छन् भने, सहकारीको भविष्य अन्योलमा परेको छ ।

तर पछिल्लो घटनाक्रमले समन्वयको प्रयासलाई समेत झस्काउने परिस्थिति बनाएको छ । सहकारी अध्यक्ष तिवारीकी श्रीमती शारदा तिवारीले आफ्नै पहलमा करिब ७ करोड रुपैयाँ सहकारीमार्फत बचतकर्तालाई फिर्ता गराउने प्रस्ताव राखेकी थिइन् । बुधबार सम्पन्न छलफलमा उनले आफ्नो तर्फबाट उक्त रकम जुटाउने र समन्वय समितिमार्फत वितरण गर्न तयार भएको बताएकी थिइन् । तर, शारदाको यो सहमति पछि उनका जेठाजु हरि तिवारीको असहमतिले सारा प्रक्रिया अवरुद्ध भएको समन्वय समितिका एक सदस्यले जानकारी दिएका छन् ।

“शारदाजीले सकारात्मक भूमिका खेल्दै रकम उपलब्ध गराउने वाचा गर्नुभएको थियो । तर अन्तिम निर्णयका लागि उनका जेठाजु हरि तिवारीको सहमति आवश्यक प¥यो । उहाँले समर्थन नगरेपछि सारा प्रक्रिया रोकियो”–समितिका एक सदस्यले नाम नखुलाई जानकारी दिए ।

बचतकर्ताहरुले भने यो घटनालाई झनै शंकास्पद रूपमा हेरेका छन् । उनीहरुको भनाइमा, रकम तिर्ने तयारीसम्म पुगिसकेको बेला पारिवारिक दबाबमा समन्वय भाँडिनु, फरार आरोपीहरूलाई जोगाउने रणनीति हुन सक्ने सम्भावना छ । यस विषयमा संस्थाका सल्लाहकार समेत रहेका हरि तिवारीले आफूले त्यसो नभनेको प्रतिक्रिया दिए । “म सुरुदेखि नै यो प्रकरणलाई मिलाउनुपर्छ र बचतकर्ताको बचत सुरक्षित तवरले फिर्ता गर्नुपर्छ भनेर लागेको हुँ, मैले बुहारीलाई कुनै कुरा भनेको पनि छैन”–उनले भने–“कतिपय गैरकानुनी काम पनि भए होलान, कागजात नमिलेका पनि हुन सक्छन्, तर कानुनी प्रक्रियामा जानुभन्दा कसरी हुन्छ बचत फिर्तातर्फ सबैले भूमिका खेल्नु जरुरी छ ।

अध्यक्ष र सचिव फरार भएको झन्डै दुई साता बितिसक्दा पनि प्रहरीले ठोस उपलब्धि नदिएको भन्दै आक्रोशित बचतकर्ताहरू अहिले पनि सहकारी कार्यालयमा घेराउमै छन् । अध्यक्ष र सचिवकी श्रीमतीहरूसहित सञ्चालकहरुलाई कार्यालयभित्रै राखेर छलफलको दवाब दिइँदै आएको छ ।

“हामी कुनै पनि हालतमा पछि हट्दैनौं। रकम फिर्ता नभएसम्म कार्यालय नछोड्ने, र फरारहरूलाई झिकाएरै छाड्ने हाम्रो अडान छ,“ पीडित सदस्य बसन्त शर्माले भने ।

अहिले सहकारीको कार्यालय बाहिर सुरक्षाका लागि पाँचवटा सशस्त्र प्रहरीका गाडी परिचालन गरिएको छ । जिल्ला प्रहरी कार्यालयका सूचना अधिकारी गणेश सापकोटाका अनुसार फरार अध्यक्ष र सचिवको खोजी जारी छ र चाँडै पक्राउ गरिने दाबी गरिएको छ ।

यसबीच, प्रदेश सहकारी कार्यालयले वास्तविकता पत्ता लगाउन आन्तरिक लेखापरीक्षणको तयारी थालेको छ । तर, पहिले नै लेखापरीक्षणमा तथ्य हेरफेर भएको आशंकाले यो प्रक्रिया पनि ढिलाइ भएको छ । पीडितहरूको एउटै माग छ— “हामी पैसा फिर्ता नपाउँदासम्म चुप लाग्दैनौं।“