खोज

गुल्मी, १४ साउन ।

करदाता सेवा कार्यालय गुल्मीले गत वर्षभन्दा ८.३८ प्रतिशत बढी राजश्व सङ्कलन गरेको छ ।

कार्यालयले आर्थिक वर्ष २०८०/०८१ मा जम्मा ३९ करोड ८५ लाख ३१ हजार ८१० रुपियाँ राजश्व सङ्कलन गरेकोमा आर्थिक वर्ष २०८१/०८२ मा ८.३८ प्रतिशतले बढेर ४३ करोड १९ लाख ४० हजार ७५० रूपैयाँ राजश्व सङ्कलन गरेको करदाता सेवा कार्यालय गुल्मीले जनाएको छ ।

करदाता सेवा कार्यालय गुल्मीका नायव सुब्बा श्रवण कुमार बुढाका अनुसार आयकर तर्फ २३ करोड ९२ लाख ८० हजार ८८०, मूल्य अभिवृद्धि कर तर्फ १८ करोड ४७ लाख ६३ हजार ५३० रुपियाँ र अन्तःशुल्क तर्फ ७८ लाख ९६ हजार ७५० रुपियाँ राजश्व सङ्कलन गरिएको छ ।

त्यस्तै आर्थिक वर्ष २०८०/०८१ मा आयकरतर्फ २३ करोड ६ लाख ८० हजार ८८०, मूल्य अभिवृद्धि कर १५ करोड ८३ लाख ९२ हजार ६८० रुपियाँ र अन्तःशुल्क ९४ हजार ५८ हजार २५० रुपियाँ राजश्व सङ्कलन भएको बुढामगरले बताए ।

जिल्लामा २०७७ सालमा करदाता सेवा कार्यालय स्थापना भएको थियो । त्योभन्दा पहिले गुल्मीवासीहरूले पाल्पा र बुटवल पुगेर सेवा लिनुपर्ने बाध्यता रहेको थियो ।

कार्यालय स्थापनासँगै नागरिकलाई करप्रति सकारात्मक बनाउने, स्थानीय तहहरूसँग समन्वय र करदाता शिक्षा सञ्चालन, अग्रिम आयकरको लागि म्यासेज, फोन र सूचना गरेका कारण राजश्व सङ्कलनमा वृद्धि भएको करदाता सेवा कार्यालय गुल्मीका कार्यालय प्रमुख एवं कर अधिकृत विक्रम पन्थीले जानकारी दिएका छन् ।

यो आर्थिक वर्षमा कार्यालयले आयकर बक्यौताबाट ३५ लाख १२ हजार र मूल्य अभिबृद्धिकर बक्यौताबाट एक करोड १४ लाख ९४ हजार रुपैयाँ उठेको पन्थीले बताए ।