खोज

‎बर्दिया, १४ साउन ।

थारू समुदायले आज आफ्ना मौलिक धार्मिक र सांस्कृतिक चाडमध्ये एक महत्वपूर्ण पर्व गुरही (गुरिया) विविध धार्मिक विधि सहित हर्षोल्लासका साथ मनाएका छन्।

गुरही पर्व विशेषगरी छोरीबेटीको रक्षा, स्नेह र समृद्धिको कामना गर्दै मनाइने परम्परागत चाड हो। यस अवसरमा थारू महिलाहरूले परम्परागत भेषभूषा र सांस्कृतिक गीतसंगीतका साथ पूजाआजा गर्दछन । सानी केटीहरूको नाममा माटो, कपडा वा बाँसबाट गुरही (गुड़िया) बनाएर सिँगारिन्छ, अनि ती गुरहीलाई घरको आँगन, गाउँको चोक वा तुलसी मञ्चमा राखी पूजा गरिन्छ।

बर्दिया, बाँके, कैलाली, कञ्चनपुर लगायत थारू बहुल जिल्लाहरूमा यो पर्व विशेष उत्साह र उमंगका साथ मनाइएको हो। स्थान–स्थानमा युवतीहरू नाचगानमा रमाइरहेका थिए भने बृद्धबृद्धा र पूजारीहरूले परम्परागत संस्कारअनुसार पूजा–अर्चना गरी चेलीबेटीको सुख, सुरक्षा र समृद्धिको कामना गरे।

बढैयाताल गाउँपालिका–५ का स्थानीय अगुवा राकेश थारूले भने, “गुरही पर्व हाम्रो संस्कृति र छोरीबेटीप्रतिको माया–स्नेहको प्रतीक हो। यो हाम्रो पुर्खाबाट चलिआएको परम्परा हो, जसलाई हामी आज पनि गर्वका साथ मनाइरहेका छौं।”

पर्वको अवसरमा गाउँमा सामूहिक भोज, रोचक खेलकुद कार्यक्रम, परम्परागत नाचगान र आपसी मेलमिलापका कार्यक्रमहरू पनि सम्पन्न भए।

संस्कृतिकर्मीहरूका अनुसार यस्तो मौलिक पर्वको निरन्तरता, संरक्षण र प्रवर्द्धनका लागि स्थानीय निकाय, समुदाय तथा विशेषगरी युवा पुस्ताको सक्रियता आवश्यक छ।