खोज

 काठमाडौं, १४ साउन ।

पछिल्लो आर्थिक वर्ष २०८१/०८२ मा वैदेशिक रोजगारीका क्रममा मृत्यु भएका एक हजार ४०१ नेपालीको शव परिवारलाई बुझाइएको छ। नेपाल प्रहरीका अनुसार मृतकहरू मध्ये सबैभन्दा धेरै २६ देखि ३० वर्ष उमेर समूहका रहेका छन्, जसमा २३३ जनाको शव नेपाल ल्याइएको थियो।

त्यस्तै, ३१ देखि ३५ वर्ष उमेर समूहका २२६ जना, ३६ देखि ४० वर्षका २२५ जना, ४१ देखि ४५ वर्षका २१५ जना र २१ देखि २५ वर्ष उमेर समूहका १७२ जनाको शव पनि विदेशबाट ल्याइएको हो।

४६ देखि ५० वर्षका ११७, ५१ देखि ५५ वर्षका ७१ र ५६ देखि ६० वर्षका २४ जनाको शव नेपाल ल्याइएको छ। त्यसैगरी, २० वर्षमुनिका २९ जना, ६१ देखि ६५ र ६६ देखि ७० वर्ष उमेर समूहमा १२-१२ जना तथा ७० वर्षभन्दा माथिका ६५ जनाको शव पनि परिवारलाई हस्तान्तरण गरिएको प्रहरीको तथ्यांकमा उल्लेख छ।

वैदेशिक रोजगारीमा ज्यान गुमाउनेहरू प्रायः देशको उत्पादनशील उमेर समूहका रहेका छन्। यो अवधिमा वैदेशिक रोजगार विभागले ४८१ वटा शव ल्याएको थियो भने एक हजार ८६ वटा शव पीडित परिवारसम्म पुर्‍याएको जनाएको छ।

विभागले एक वर्षभित्र एक हजार ५१७ जना मृतक कामदारका परिवारलाई एक अर्ब २ करोड ३४ लाख रुपैयाँ आर्थिक सहायता पनि उपलब्ध गराएको छ। सरकारले वैदेशिक रोजगारीका क्रममा मृत्यु हुने कामदारका परिवारलाई प्रतिव्यक्ति १० लाख रुपैयाँ राहत स्वरूप प्रदान गर्दै आएको छ।