खोज

कपिलवस्तु, १४ साउन ।

पर्यटन प्रवद्र्धन गर्न भन्दै लुम्बिनी प्रदेश सरकारले “घुम्न जाऔं बर्दिया–२०२५” कार्यक्रम ल्यायो । २०८१ साल पुस ४ गते देशका ७ वटै प्रदेशका पर्यटन मन्त्री र सचिव बोलाएर बर्दियाको ठाकुरद्वारामा भव्य कार्यक्रम आयोजना गरियो ।

प्रदेशका मुख्यमन्त्री चेतनारायण आचार्यले बर्दिया निकुञ्ज र यस क्षेत्रका पर्यटन, होटल व्यवसायी संगै समुदायको आयआर्जनमा ठूलो परिवर्तन आउने दाबी गर्दै कार्यक्रम उद्घाटन गरे । प्रदेश पर्यटन मन्त्रालयको पर्यटन विकास परिषद मार्फत संचालित अभियानलाई स्थानीय ठाकुरबाबा नगरपालिकाले समेत सहकार्यको हात बढायो ।

तर अहिले आएर लुम्बिनी प्रदेश सरकारले आफुहरुलाई चुतिया बनाएको बर्दियाका होटल तथा पर्यटन व्यवसीहरुले आरोप लगाउन थालेका छन् । “घुम्न जाऔं बर्दिया–२०२५” कार्यक्रम सुरु भएको ८ महिना वितिसक्दा समेत सरकार छेउँछाउँमा पनि नदेखिएको उनीहरु बताउँछन् ।

आन्तरिक तथा बाह्य पर्यटक ल्याउन अभियानको रुपमा चित्रण गरिएको उक्त कार्यक्रम पूर्ण रुपमा असफल बनेको होटल व्यवसायीहरुको दाबी छ । होटल संघ नेपाल बर्दियाका अध्यक्ष मोहन चौधरीले लुम्बिनी पर्यटन विकास परिषद र लुम्बिनी प्रदेश सरकारले बर्दियाको नाम बेचेको तर काम नगरेको आरोप लगाउँछन् ।

पर्यटन विकास परिषदका निर्देशक रामु जोशीले पटक–बर्दियाको नाम बेचेको तर परिषदले देखिने एउटा कुनै काम भने नगरेको बताए । “बर्दिया राष्ट्रिय निकुञ्ज, यहाँको बाघ, बन्जन्तुहरु, चराहरु र यहाँको पर्यापर्यटन विश्वभरी प्रख्यात छ, यसको नाम बेच्न जोशीलाई सजिलो भएर कार्यक्रम ल्याएजस्तो गरेको हो”– हानका अध्यक्ष चौधरीले भने । ठाकुरद्वारामा रहेका ३४ बढी होटल तथा रिसोर्टहरुले ठूलो समस्याहरु खेप्दा समेत सरकारले बेकुफ बनाउन बाहेक केही नगरेको उनको आरोप छ । “पर्यटन विकास परिषदले नाम भिजिट बर्दिया राखेको तर काम डिलिट बर्दिया गरेको उनी बताउँछन् ।

बर्दिया निकुञ्ज वरपर रहेका होमस्टे संचालकहरुले समेत “घुम्न जाऔं बर्दिया–२०२५” कार्यक्रम सुनेको तर यसबारे कुनै कार्यक्रम वा गतिविधिमा सहभागी नभएको बताउँछन् । पर्यटन विकास परिषदले बर्दियाका कुनै पनि होमस्टेमा कुनै आयआर्जन, सुधार वा सहयोगको कार्यक्रम नगरेको डल्ला होमस्टे संचालक समिति अध्यक्ष परशुराम चौधरी बताउँछन् ।

“बर्दियामा पर्यटक बढे बल्ला होमस्टे चल्छ, आयआर्जन बढ्छ, झुठा आश्वासनले पेट भोको हुने मात्र हो ।” सरकार र त्यसका निकायहरुको यस्तै गतिविधिले पर्यटन व्यवसायमा नकारात्मक असर परिरहेको होमस्टे संचालकहरु बताउछन् । निकुञ्ज संग जोडिएका ४ वटा गाउँमा ६५ घरमा घरबास(होमस्टे) संचालित छ ।

लुम्बिनीको सूचना केन्द्रमै छैन इन्टरनेट 

त्यसो त बर्दिया मात्र होइन लुम्बिनी क्षेत्र पनि पर्यटन विकास परिषदले आफ्नै कारणले पर्यटक बढेको दाबी छ । प्रदेश सरकारको अधिपत्य देखाउन त्यहा परिषदले एउटा सूचना केन्द्र समेत राखेको छ ।

विश्वभरका पर्यटकहरु आउने लुम्बिनीमा प्रदेश सरकारको निकायले राखेको सूचना केन्द्रमा भने इन्टरनेट छैन । परिषदले फागुन देखि संचालनमा ल्याएको उक्त सूचना केन्द्रमा आवश्यक पर्ने प्रचार सामाग्री, ब्रोउसर, म्याप छैन भने आवश्यक पर्ने फर्निचर समेत छैन ।

लुम्बिनी अखण्ड शान्तिदिपको पूर्वपट्टी रहेको माथिल्लो तल्लामा रहेको भवनमा गर्मीले बसिनसक्नु हुदा पर्यटक पस्न मान्दैनन् । अरु त अरु परिषदका निर्देशक जोशी लुम्बिनी आउदा समेत त्यहा पस्दैनन् । परिषदले राम्रो संग काम गर्न नसक्दा लुम्बिनी विकास कोषले दिने भनेको एक कर्मचारी समेत दिएको छैन ।