खोज

बुटवल, १३ साउन ।

लुम्बिनी प्रदेशमा लोकतान्त्रिक समाजवादी पार्टी (लोसपा) ले ३० मिनेट प्रतिपक्षमा बसेर मन्त्री उपहार पाएको छ । एक वर्षअघि माओवादी नेतृत्वकको सरकार ढलेपछि एमाले नेतृत्वको सरकारलाई लोसपाले समर्थन गरेको थियो । सत्तापक्षबाट नै कृत्रिम प्रतिपक्ष बने पछि लोसपालाई लुम्बिनी प्रदेशले मन्त्री उपहार दिएको हो ।

आर्थिक वर्ष २०८२/८३ को बजेट आएपछि विभेदकारी बजेट भन्दै प्रतिपक्ष दल माओवादी केन्द्र लगायत अन्य साना दलसदन बहिष्कार गरी निस्किएपछि सरकारले बजेट पास गराउनका लागि एकाएक मन्त्री बनाउने सहमतिमा कृत्रिम प्रतिपक्षको रुपमा लोसपालाई प्रतिपक्षको बेञ्चमा राखी बजेट पास गरेको थियो ।

बजेट पास गराउनको लागि असार १७ गते सरकारलाई दिएको समर्थन फिर्ता लिई प्रतिपक्षमा बसेको लोसपाले साउन ११ गते आइतबार पुनः समर्थन गरेको भन्दै प्रदेशसभा सचिवालयमा पत्र दर्ता गराएको हो ।

यससँगै लोसपाका संसदीय दलका नेता सन्तोष पाण्डे पुनः मन्त्रिपरिषदमा आएका छन् । उनलाई युवा तथा खेलकुद मन्त्रालयको जिम्मेवारी दिइएको छ ।

बजेट पास गर्ने दिन विपक्षी बेञ्चमा बसेर विरोध जनाएको लोसपा पुनः समर्थनसहित सत्तामा फर्किँदा राजनीतिक विश्वासनीयता र नैतिकताबारे प्रश्न उठेको छ ।

फरक–फरक सरकारमा सहभागी हुँदै पटक–पटक मन्त्री बनेका कारण पाण्डेयलाई कतिपयले ‘अवसरवादी’ नेताका रूपमा समेत चित्रण गर्छन् । लोसपाबाट पटक–पटक अवसर पाउनेमा उनी एक्ला नेता हुन् ।

पाण्डेलाई सोमबार प्रदेश प्रमुख कृष्णबहादुर घर्तीले पद तथा गोपनीयताको शपथ ग्रहण गराएका छन् । शपथ समारोहमा मुख्यमन्त्री चेतनारायण आचार्य, पूर्व मुख्यमन्त्री डिल्लीराज चौधरी, लगायत अन्य मन्त्रीहरू तथा उच्च पदस्थ अधिकारीहरूको उपस्थिति रहेको थियो ।

मुख्यमन्त्री आचार्यले अघिल्लो एक वर्षदेखि आफूले सम्हाल्दै आएको युवा खेलकुद मन्त्रालय पाण्डेलाई हस्तान्तरण गरेका हुन् । पाण्डे यसअघि २०७८ सालमा शंकर पोखरेल नेतृत्वको सरकारमा भौतिक पूर्वाधार विकास मन्त्री र २०८० वैशाखमा डिल्ली चौधरी नेतृत्वको सरकारमा गृहमन्त्री भइसकेका छन् । यो उनको तेस्रो कार्यकाल हो ।

सन्तोष पाण्डेको मन्त्री नियुक्तिपछि लोसपा भित्रै पनि असन्तुष्टि सतहमा आएको छ । पार्टीका उपनेता कन्हैया बानियाले कुनै पनि दलको सल्लाह र निर्णयबिना पाण्डेले सरकारमा सहभागी भएको भन्दै सार्वजनिक रूपमा असन्तुष्टि जनाएका छन् ।

उनले भने, “संसदीय दलमा छलफल नै नगरिकन मन्त्री बन्नु पार्टीको निर्णयविपरीत हो ।”

लुम्बिनी प्रदेश सरकारमा अब मुख्यमन्त्रीसहित १२ जना मन्त्री भएका छन् । जसमध्ये एमालेबाट ५, कांग्रेसबाट ५, जसपाबाट १ र लोसपाबाट १ जना मन्त्री रहेका छन् ।

गठबन्धनले साना दलहरूलाई मन्त्रालय दिने भन्दै अघिल्लो वर्षदेखि एउटा मन्त्रालय खाली राखेको थियो । त्यो मन्त्रालय अहिले लोसपालाई दिइएको हो ।