खोज

भैरहवा, १२ साउन ।

जिल्ला ट्राफिक प्रहरी कार्यालय रुपन्देहीले आर्थिक वर्ष २०८१/०८२ मा ५० हजार बढी कारबाहीबाट ६ करोड बढी राजस्व असुल गरेको जनाएको छ ।

भैरहवामा वार्षिक प्रगति सार्वजनिक गर्दै ट्राफिक प्रहरी प्रमुख रञ्जु केसीले गएको वर्षमा ५० हजार ४४१ कारबाही गरिएको जानकारी दिइन ।

सो कारबाहीबाट ६ करोड ८ लाख ४९ हजार १२ रुपैयाँ राजस्व असुल भएको उनले बताइन । यो मध्ये तीव्र गतिमा सवारी चलाउने ६ हजार ११४ जना सवारी चालकबाट ३१ लाख ५५ हजार रुपैयाँ जम्मा भएको उनले बताइन ।

यसै गरी चार पाङग्रे ठुला सवारी साधन लक्षित संयुक्त चेकजाँचमा ३२ वटा सवारी साधन नियन्त्रणमा लिएर १५ लाख ४२ हजार ६९५ रुपैयाँ राजस्व दाखिला गराएको केसीले बताइन ।

रुपन्देही जिल्लामा पछिल्लो समय सवारी दुर्घटनाको सङ्ख्या भयावह रूपमा बढिरहेको छ । जिल्ला ट्राफिक प्रहरी कार्यालयको तथ्यांक अनुसार, दुर्घटनामध्ये सबैभन्दा बढी मोटरसाइकल र स्कुटरसँग सम्बन्धित रहेको पाइएको छ । यसले गर्दा जिल्लामा सवारी सुरक्षा र जनचेतनाको विषयमा गम्भीर प्रश्न उठेको छ ।

के भन्छ तथ्याङ्क
आर्थिक वर्ष २०८१/०८२ को तथ्याङ्क केलाउदा रुपन्देहीमा कुल ८ सय २ वटा दुर्घटनामा १ हजार १६२ सवारी साधन संलग्न रहेका छन् । यस मध्ये सबै भन्दा बढी मोटरसाइकल र स्कुटीहरू ७९५ वटा रहेको केसीले बताइन ।

त्यसपछि जिप, कार १२० वटा, शारीरिक श्रमले चल्ने साइकल जस्ता साधनहरू ६७ वटा, ट्रक, टैंकर ४५, बस ३८, टेम्पो ३६, टिप्पर २८, टे«क्टर २३, माईक्रो ७, १ वटा डोजर र २ वटा अन्य सवारी साधन रहेको केसीले जानकारी दिइन ।

यी दुर्घटनामा परि २३ महिला र ९८ जना पुरुष गरी १२१ जनाको मृत्यु भएको छ भने ३१९ जना महिला र ९१३ जना पुरुष गरी १ हजार २३१ जना घाइते भएको ट्राफिक प्रहरीको तथ्याङ्क छ ।

ट्राफिक प्रहरीका अनुसार, मोटरसाइकल दुर्घटनाका मुख्य कारणहरूमा तीव्र गति, मादक पदार्थ सेवन (मापसे) गरी सवारी चलाउनु, ट्राफिक नियमको उल्लङ्घन, हेलमेट नलगाउनु र सडकको खराब अवस्था रहेका छन् ।

विशेष गरी युवा वर्गमा हेलमेट नलगाई तीव्र गतिमा मोटरसाइकल चलाउने प्रवृत्ति बढी देखिएको छ, जसले गर्दा दुर्घटनाको जोखिम अझ बढेको छ । यस समस्यालाई न्यूनीकरण गर्नका लागि ट्राफिक प्रहरीले विभिन्न पहलहरू गरिरहेको जनाएको छ ।

जिल्ला ट्राफिक प्रहरी कार्यालयका प्रमुख रन्जु केसीले नियमित रूपमा सचेतना कार्यक्रम, मापसे चेकजाँच र तीव्र गति नियन्त्रणका लागि अभियान चलाएको बताइन ।

यद्यपि, नागरिकहरूमा स्वयं सचेतना नआएसम्म दुर्घटना पूर्ण रूपमा नियन्त्रणमा ल्याउन चुनौती रहेको ट्राफिक प्रहरी प्रमुखको भनाइ छ ।

उनले दुर्घटना न्यूनीकरणको प्रयास स्वरूप विद्यार्थी लक्षित, पैदल यात्रु लक्षित, चालक लक्षित गरी विभिन्न सचेतनामूलक कार्यक्रमहरू गरिरहेको बताइन ।