खोज

चितवन, १२ साउन।

चितवनका विभिन्न स्थानमा देखिएको विद्युत आपूर्तिको समस्या बारे जानकारी लिन नेपाल विद्युत प्राधिकरणका कार्यकारी निर्देशक हितेन्द्रदेव शाक्य चितवन गएका छन्।

शनिबार नेपाल विद्युत प्राधिकरणको चनौली सबस्टेशनले लाइन कटौतीसम्बन्धी सूचना जारी गरेपछि चितवनमा लोडसेडिङ सुरु भएको भन्दै सामाजिक सञ्जालमा व्यापक आलोचना भएको थियो। त्यसपश्चात प्रत्यक्ष रुपमा समस्या बुझ्नको लागि शाक्य आइतबार बिहान भरतपुर गइसकेका हुन्।

शाक्यको सचिवालयका इन्जिनियर नारायण अर्यालका अनुसार, भरतपुरको अवस्था अवलोकन गरेपछि शाक्य पूर्वी चितवनको राप्ती नगरपालिका स्थित हर्दी सबस्टेशन जाँदै छन्।

हर्दी सबस्टेशनमा आइतबार राति २४ एमभीएको नयाँ ट्रान्सफर्मर जडान गरेर परीक्षण सम्पन्न गरिएको छ। ट्रान्सफर्मरको स्थापना कार्य सकिएको र हाल लाइन चार्ज गर्ने प्रक्रिया सुरु गरिएको सबस्टेशनका इन्चार्ज रोशन खनियाँले बताए । उनले केही प्राविधिक परीक्षण बाँकी रहेकाले चाँडै लाइन जोडिने जानकारी दिए।

२४ एमभीएको ट्रान्सफर्मर जडान भएसँगै हर्दी सबस्टेशनबाट पूर्वी चितवनका अधिकांश स्थानहरूमा विद्युत आपूर्ति गरिनेछ। यसले भरतपुरबाट पूर्वतर्फ जाने लाइनको लोड घटाउने छ।

खैरहनी नगरपालिका अन्तर्गत चैनपुर र रत्ननगर नगरपालिका अन्तर्गत टाँडीमा रहेका सबस्टेशनहरूलाई हर्दीबाट विद्युत आपूर्ति दिने तयारी छ। त्यसपछि भरतपुरको लाइन सिधै देवनगर र जगतपुर हुँदै पश्चिम चितवन तथा माडीमा प्रयोग गरिनेछ।

हाल देवनगरबाट टाँडी र पर्सातर्फ विद्युत आपूर्ति भइरहेको छ। तापक्रम बढेसँगै पूर्वी चितवनका टाँडी, खैरहनी, राप्ती तथा माडी र पश्चिम चितवनमा पनि विद्युत आपूर्तिमा समस्या देखिएको थियो। टाँडी र माडीका सबस्टेशनमा स्थानीयले विरोध जनाउँदै आएका थिए।

प्राधिकरणले चितवनमा देखिएको विद्युत समस्या मंगलबारसम्म समाधान हुने आश्वासन दिएको छ।