खोज

• डिङ्गरनगर दूरगामी बहुउद्देश्यीय सहकारीका अध्यक्ष घनश्याम तिवारी लुकेको आशंकामा शेयरधनीहरूले ड्राइभरटोलस्थित दिदीको घरमा रातभर धर्ना दिए।
• पीडितहरूले तिलोत्तमा नगरपालिकाका मेयर रामकृष्ण खाँणमाथि सहकारी सञ्चालकलाई संरक्षण गरेको आरोप लगाए।

• तिवारीकी श्रीमती सोही घरमा देखिएपछि अध्यक्ष पनि त्यहीँ लुकेका हुनसक्ने आशंका गरिएको छ।

बुटवल, १२ साउन ।

रुपन्देहीको तिलोत्तमास्थित डिङ्गरनगर दुरगामी बहुउद्देश्यीय सहकारीका अध्यक्ष घनश्याम तिवारी लुकेको आशंकामा ड्राईभरटोलस्थित उनको दिदीको घरमा शेयरधनीहरुले रातभर धर्ना दिएका छन् ।

सञ्चालक समितिका सदस्यहरुसहित शेयरधनी बचतकर्ताहरुले तिवारीकी दिदी माया भट्टराईको घरमा राति ११ बजेदेखि सुरु गरेको धर्ना अहिलेसम्म चलिरहेको छ ।

अध्यक्ष तिवारीकी श्रीमती शारदा तिवारी आइतबार सो घरमा आएको र अध्यक्ष तवारी पनि सोही घरमा लुकेर बसेको आशंकामा उनीहरुले धर्ना दिएका हुन् । धर्नामा सहभागी शेयरधनी रमा जिसीले आफूहरुको बचतको सुरक्षा हुनुपर्ने र बचत फिर्ता पाउनुपर्ने मुख्य माग रहेको भन्दै लुकेर समस्याको समाधान नहुने बताइन् । “भागेर समस्याको समाधान हुँदैन, छानविनको दायरामा आउनुपर्छ, ठगी गर्नेमाथि कारवाही हुनुपर्छ, हाम्रो मुख्य माग बचत फिर्ताको हो”–उनले भनिन् ।

अर्की शेयर सदस्य वसुन्धरा जिसीले पनि अध्यक्ष र श्रीमती आफ्नो दिदीको घरमा लुकेर बसेको आशंकाले आफूहरुले धर्ना दिइरहेको बताइन् । धर्नाका क्रममा सोमबार बिहान तिलोत्तमा वडा नम्बर ४ का वडाध्यक्ष हरिबहादुर क्षेत्री, टोल विकास संस्थाका अध्यक्ष तथा ड्राइभरटोल प्रहरी चौकीको टोली समेत पुगेको समेत पुगेको थियो । अहिले भने इलाका प्रहरी कार्यालय बुटवलको टोली धर्नास्थलमा पुगेको छ ।

उक्त सहकारीका अध्यक्ष घनश्याम तिवारी र सचिव रामबहादुर थापालाई एक साताअघि नै रुपन्देही जिल्ला अदालतले पक्राउ पुर्जी जारी गरेको थियो । तर उनीहरुलाई पक्राउ गर्न प्रहरीले पनि आलटाल गरिरहेको र राजनीतिक संरक्षणको आडमा लुकेर बसेको आरोप पीडित बचतकर्ताहरुले लगाएका छन् ।

यता, सहकारीमा भएको हिनामिनाको विषयलाई लिएर सञ्चालकहरू नै विभाजित छन् । फरार रहेका सहकारीका अध्यक्ष तिवारी र सचिव थापाका परिवारले सहकारीबाट अपचलन भएको रकममा सहकारीका सबै सञ्चालक जिम्मेवार हुने जिकिर गरेका छन् ।

यही विवादका कारण बचतकर्तालाई उनीहरूको बचत फिर्ता गर्नका लागि बनेको सहमति अन्तिम समयमा भाँडिएको थियो । त्यसपछि सहकारीका अध्यक्ष तिवारी र सचिव थापा माइन्युट च्यातेर फरार भएका हुन् । अन्य सञ्चालकहरू भने सहकारीमा भएको हिनामिनाको विषयमा अध्यक्ष र सचिव जिम्मेवार हुने बताउँदै आएका छन् ।

इलाका प्रहरी कार्यालय बुटवलका डीएसपी इन्द्रबहादुर रानाले भने अध्यक्ष र सचिव अझैसम्म फेला नपरेको बताए । “फेला पर्ने बित्तिकै पक्राउ गरेर अनुसन्धान अगाडि बढाउँछौं”–उनले भने ।

१ अर्ब अपचलन

उक्त सहकारीको अन्तिम लेखा परीक्षण अहिलेसम्म सार्वजनिक गरिएको छैन । तर, प्रारम्भिक जानकारीअनुसार सहकारीका सञ्चालकले अपचलन गरेको रकम १ अर्बभन्दा बढी छ । “अहिलेसम्म अध्यक्ष र सचिव हामीले चलाएको २÷४ करोड त हो भनेर ढुक्कले बसेका थिए,” आफ्नो नाम उल्लेख नगर्ने सहकारीको लेखापरीक्षणमा संलग्न एक सदस्य भन्छन्, “१ अर्बभन्दा बढी अपचलन हुने देखिएपछि बल्ल फरारका आफन्त पनि आत्तिएका छन् । भोलि मुद्दा चल्दा १ अर्बभन्दा बढीको बिगो मागदाबी हुन्छ ।”

सहकारीको सफ्टवेयरमा १३ हजारपटकसम्म अंक तथा अक्षर ‘डिलिट’ गरेको भेटिएको छ । त्यसैगरी, ऋण नलगेका सहकारीका बचतकर्ताको नाममा ऋण देखाइएको छ भने सहकारी तथा बैंकको सफ्टवेयर ‘अफ आवर’ मा पनि चलेको पाइएको छ ।

सहकारीका ५८५ ऋणीमध्ये करिब ५० जनालाई धितोबिना नै ऋण प्रवाह गरिएको छ । धितो राखेर ऋण दिएको भनिएकाको धितो मूल्यांकन गरिएको छैन । र, धितो नाम मात्रको छ । सहकारीका सचिव रामबहादुर थापाको मात्र ८७ पटक ऋण जारी गरेको पाइएको छ ।

त्यसैगरी, करिब ४३ करोड सेवा शुल्कबिना ऋण प्रवाह गरिएको पाइएको छ । त्यस्तै, ऋण नलिएका ऋणीहरूको महिनाको मसान्तसम्म ऋण देखाइएको पाइएको छ भने अर्को महिनाको ४÷५ गते ऋण चुक्ता गरेर शून्य बनाइएको पाइएको छ ।

सहकारीका व्यवस्थापक वसन्त पराजुलीले सहकारीका अध्यक्ष तिवारी र सचिव थापाको निर्देशनमा काम गरेको बयान प्रहरीलाई दिएका छन् । अनुसन्धानमा संलग्न एक प्रहरीका अनुसार पराजुलीले आफूले २ देखि ३ करोड चलाएको र बाँकी रकमका विषयमा जबर्जस्ती तमसुक गर्न लगाएको बयान दिएका छन् ।

सहकारीका अध्यक्ष, उपाध्यक्ष सचिवसहित कोषाध्यक्षले आफूलाई जबर्जस्ती बाँकी रकममा तमसुक गराएको उनले प्रहरीसँग बताएका छन् । पराजुलीले आफू आफ्नी श्रीमती, छोराछोरी तथा अन्य बचतकर्ताको नाममा प्रवाह भएको रकम २०८२ असार मसान्तमा तिर्नेगरी ५ जेठ २०८२ मा तमसुक गरेका थिए ।