खोज

लमही, ११ साउन ।

पर्यटन प्रवर्द्धन भ्यु टावर पर्यटकीय आकर्षणको रूपमा पछिल्लो समयमा भ्युटावर बनाउन पालिकाहरूमा लहर नै चल्यो ।

यसबाट स्थानीय तथा बाह्य पर्यटकलाई आसपासको दृश्यावलोकन गर्न सहज हुने तथा यसले आन्तरिक पर्यटन विकासमा मद्दत गर्छ भन्ने उद्देश्यले पालिकाले धमाधम बनाए ।

भ्यूटावर निर्माण गर्ने क्रममा लमही नगरपालिका पनि एक हो । लमही नगरपालिकाको लमहीमा निर्माणाधीन भ्यु टावर अलपत्र अवस्थामा छ । संरचना आकर्षक भए पनि प्रयोग विहीन हुँदा अलपत्र जस्तै बनेको हो ।

लमही नगरपालिकामा तत्कालीन नगरप्रमुख कुलबहादुर केसीको कार्यकालमा भ्यु टावर निर्माण गरिएको हो । करिब एक करोड बढी स्थानीय तहको बजेटमा निर्माण भएको भ्यु टावरले अहिले एक्लै लमही बजार नियालिरहेको छ ।

पर्यटकको आवात जावात नहुँदा भ्यु टावरको अस्तित्व शंकटमा देखिन्छ । तर सामुदायिक बनले संरक्षणका नाममा बन्द गरिदिँदा पर्यटकको आवतजावत ठप्प छ ।

खुल्ला अवस्थामा रहँदा मानिसबाटै क्षेती हुन थालेपछि स्थानीय सामुदायिक बनले उक्त भ्यु टावरको संरक्षणका लागि बन्द गरेको हो । बन्द पश्चात् थप क्षति हुनबाट जोगिएको छ ।

अजमरी सामुदायिक वनको बिचमा झट्ट हेर्दा प्रशासनिक भवन जस्तो देखिने ग्रिन पार्कदेखि उत्तर साइडमा निर्माण अवस्थामा रहेको पाँच तल्लाको भ्यु टावर चारैतिर बन्द अवस्थामा छ ।

भएअनमा लगाइएका झ्याल ढोकाकामा चर्किएका सिसा, खियाले थलिएका गेट देख्दा सार्वजनिक सम्पत्तिको सदुपयोग नभएको अनुभूत हुन थालेको स्थानीय बताउँछन् ।

भ्यु टावर निर्माण पश्चात् नत सम्बन्धित सामुदायिक वनले संरक्षणमा चासो देखाएको छ नत नगरपालिकाले । बनको क्षेत्रमा निर्माण भएको भ्यु टावर स्थानीय सामुदायिक बनले संरक्षण गर्ने साझा सहमति भएको तत्कालीन लमही नगरपालिकाका मेयर केसी बताउँछन् ।

सरकार फेरियो, बनका पदाधिकारी फेरिए तर छलफल र सञ्चालन तर्फ कसैको ध्यान जान सकेन । अहिले भने उक्त भ्यु टावर सञ्चालनका लागि सरोकारवाला लागिपरेका छ ।

जनताको पैसाबाट निर्माणाधीन भ्यु टावर सञ्चालनका लागि जनदबाब पनि बढेको छ । भ्यु टावर सञ्चालनका लागि लमहीमा सर्वदलीय सर्वपक्षीय छलफल भएको छ ।

अजम्मरी सामुदायिक वन समितिले सरोकारवालाहरू सँग अन्तर्क्रिया तथा छलफल गरेको हो । बन समितिले उक्त भ्यु टावर नितिगत रूपमा बनलाई हस्तान्तरण गर्नुपर्ने माग गरेको छ ।

समितिका अध्यक्ष पवन शर्मा रिजालले भ्यु टावर सञ्चालन पश्चात् ग्रिन पार्कको आकर्षण थप बढ्ने विश्वास व्यक्त गरे । दीर्घकालीन योजना बनाएर भ्यूटावर सञ्चालन गर्ने तर्फ सबै लाग्नुपर्ने बताए ।

अध्यक्ष रिजालले भ्यु–टावरको माथिल्ला दुई वटा तला दृश्यावलोकन, र बाँकी तल्लाहरूमा ब्यबसायिक रूपमा प्रयोग गर्न सकिने योजना सुनाए ।

त्यसका लागि स्पष्ट कार्यविधि बनाएर उपभोक्ता वा निजी क्षेत्रलाई सञ्चालनका लागि दिने अथवा ठेक्का माध्यमबाट प्रयोगमा ल्याउने धारणा सुनाए । उनले स्थानीय तहको समन्वयमा परामर्शदाता नियुक्त गरेर कार्यविधि बनाउने हो कि भन्ने छलफल गरिरहेको बताए ।

लमही नगरपालिका नगर प्रमुख जोगराज चौधरीले ग्रीनपार्क लमहीको मात्र नभई प्रदेशकै गहना भएको बताए । पार्कलाई अझै व्यवस्थित तथा आकर्षक बनाउन आवश्यक रहेको भन्दै भ्यु टावर सञ्चालनले पर्यटक आगमन बढ्ने विश्वास व्यक्त गरे ।

भ्यु टावर सञ्चालनका लागि हस्तान्तरणले रोकिएको हो भने नगरपालिकाले छिट्टै हस्तान्तरण गर्ने बताए । बहुउद्देश्यीय भ्यु टावर सञ्चालन सँगै पार्कको आकर्षण बढाउन नगरपालिका तत्पर रहेको बताउँदै मेयर चौधरीले आन्तरिक तथा बाह्य पर्यटक भित्र्याउन नगरपालिका लागिपर्ने बताए ।

उनले पर्यटकीय क्षेत्रले स्थानको चर्चासँगै विकास र रोजगारले पनि गति लिने बताए । कार्यक्रममा अजम्मरी सामुदायिक वन समितिका उपाध्यक्ष रवि श्रेष्ठले भ्यूटावर ठेक्का लगाएर टावर परिसरमा पौडी पोखरी, पानीको फोहोरा, पार्किङ, रेस्टुरेन्ट, निर्माण गरी एकीकृत रूपमा सञ्चालन गर्ने योजना रहेको सुनाए ।