खोज

काठमाडौं, असार ११ ।

अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईविरुद्ध गम्भीर भ्रष्टाचार र अनियमिततासम्बन्धी तीन वटा विवादास्पद प्रकरणमा छानबिन गर्न माग गर्दै उजुरी दर्ता गरिएको छ। सिन्धुलीको कमलामाई नगरपालिका निवासी युवराज पौडेलले आइतबार आयोगमै पुगेर उजुरी दर्ता गरेका हुन्। उजुरी ‘सी–००३४९८’ नम्बरमा दर्ता भएको छ।

पौडेलले राईलाई वाइडबडी विमान खरिद अनियमितता, नेपाल आयल निगमको जग्गा खरिद भ्रष्टाचार तथा नक्कली भुटानी शरणार्थी प्रकरणमा संलग्न भएको भन्दै तीव्र छानबिन र कानुनी कारबाहीको माग गरेका छन्। उजुरीमा ती घटनामा राईको संलग्नता स्पष्ट देखिँदा पनि उनीमाथि हालसम्म कुनै अनुसन्धान नहुनु आपत्तिजनक भएको उल्लेख छ।

वाइडबडी विमान खरिद प्रकरण

विशेष अदालतले हालै सार्वजनिक गरेको वाइडबडी विमान खरिदसम्बन्धी मुद्दाको पूर्णपाठमा ‘दूषित निर्णय प्रक्रियामा संलग्न शुरुवाती व्यक्तिहरूमाथि अनुसन्धान नभएको’ न्यायिक टिप्पणी गरिएको थियो। अदालतले अभियोजनको क्रममा केहीलाई मात्र आरोपित बनाई केहीलाई उन्मुक्ति दिनु ‘चयनात्मक अभियोजन’ भएको भन्दै आलोचना गरेको छ। पौडेलले यसै सन्दर्भमा राईलाई पनि पुरक अभियोग पत्रमार्फत मुद्दा दायर गर्नुपर्ने माग गरेका हुन्।

नेपाल आयल निगमको जग्गा खरिद

पौडेलले दायर गरेको उजुरीमा उल्लेख गरिएअनुसार राई आपूर्ति मन्त्रालयको सचिवका हैसियतमा नेपाल आयल निगमको सञ्चालक समितिका अध्यक्ष थिए। सोही समयमा निगमले विभिन्न स्थानमा अत्यधिक मूल्यमा जग्गा खरिद गरेको प्रकरणमा तत्कालीन कार्यकारी निर्देशक गोपाल खड्कामाथि मात्र मुद्दा चलाइएको, तर निर्णय तहमा रहेका राई जस्ता उच्च पदस्थ व्यक्तिहरू उम्किनु अनुचित भएको तर्क गरिएको छ। पौडेलले तामेलीमा राखिएको सो फाइल पुनः खोली निष्पक्ष अनुसन्धान गर्न माग गरेका छन्।

नक्कली भुटानी शरणार्थी प्रकरण

यस प्रकरणमा समेत पौडेलले राईमाथि गम्भीर प्रश्न उठाएका छन्। केही आरोपितले बयानमा आफूहरूले तत्कालीन गृहसचिव राईको गाडीमा नगद राखिदिएको स्वीकार गरिसकेका छन्। तर, ती आरोपहरूबारे प्रहरीले कुनै अनुसन्धान नगरेको भन्दै पौडेलले उजुरीमार्फत अख्तियारलाई निष्पक्ष छानबिन गर्न आग्रह गरेका छन्।

पौडेलले उजुरीमा भनेका छन्, “अख्तियार प्रमुखको जिम्मेवारीमा रहेका प्रेमकुमार राईमाथि तत्काल पुरक अभियोगपत्रमार्फत मुद्दा दायर गरी हदैसम्मको कारबाही गर्न आयोगसँग अनुरोध गर्दछु।”