खोज

नेपालगञ्ज , १० साउन ।

नेपाली साहित्य र सङ्गीतका उज्यालो तारा, बहुप्रतिभाका स्रष्टा स्वर्गीय प्रेम प्रकाश मल्ल ‘मधुकर’ को स्मृतिमा स्थापना गरिएको “प्रेम प्रकाश मल्ल मधुकर स्मृति पुरस्कार“ यस वर्ष डा. हरिप्रसाद तिमिल्सिनालाई प्रदान गरिएको छ ।

स्वर्गीय मल्लको ९०औँ जन्मजयन्तीको अवसरमा शनिबार नेपालगञ्जमा आयोजित एक भव्य समारोहका बीच नेपाल प्रज्ञा प्रतिष्ठानका पूर्व सदस्य तथा महेन्द्र बहुमुखी क्याम्पसका उप–प्राध्यापक समेत रहेका साहित्यकार तिमिल्सिनालाई पुरस्कार प्रदान गरिएको हो ।

सम्मानस्वरूप उनलाई नेपाल प्रज्ञा प्रतिष्ठानका पूर्व सदस्य सचिव सनत रेग्मी दोसल्ला ओढाई, नगद रु. ५१ हजार एक सय ११ र सम्मानपत्र प्रदान गरे । पुरस्कार वितरण समारोह भेरी साहित्य समाज केन्द्रीय समितिको आयोजनामा सम्पन्न भएको हो ।

भेरी साहित्य समाजका अध्यक्ष इन्द्रबहादुर बस्नेत, प्राध्यापक डा. कृष्णप्रसाद घिमिरे, प्रज्ञा प्रतिष्ठानका सदस्य महानन्द ढकाल, साहित्यकार नरेन्द्रजङ्ग पिटरलगायतका विशिष्ट व्यक्तित्वहरूको उपस्थिति रहेको कार्यक्रममा स्वर्गीय मल्लको साहित्यिक र सङ्गीतिक योगदानलाई स्मरण गरिएको थियो ।

पोखरा र वनकी म चरीजस्ता कालजयी गीतहरूका स्रष्टा मल्ल बहुप्रतिभाका धनी थिए । वि.सं. १९९३ साउन ११ गते जन्मनुभएका मल्लको २०७२ वैशाख ११ गते निधन भएको थियो ।

स्व. मल्लकी छोरी वाणीश्री मल्लले आफ्ना पिताको योगदानलाई जीवन्त राख्नको लागि यो पुरस्कार कोषको स्थापनामा मुख्य भूमिका खेलिन् । सुरुमा रु. ५ लाख १ सय ४७ को कोष स्थापना गरिएकोमा शनिवारको समारोहमा वाणीश्रीले थप रु. १ लाख योगदान गर्दै कोषको जम्मा रकम रु. ६ लाख १ सय ४७ पुगेको समाजका अध्यक्ष बस्नेतले जानकारी दिए ।

उनले भने, “स्वर्गीय मल्लले साहित्य र सङ्गीतमा जे योगदान दिनुभयो, त्यो राष्ट्रकै गहना हो । त्यसलाई उजागर गर्न हामीले अझ धेरै काम गर्न बाँकी छ ।’’

कार्यक्रममा विभिन्न साहित्यिक व्यक्तित्वहरूद्वारा मल्लको सिर्जनात्मक योगदानलाई विशेष रूपमा उजागर गरियो। साहित्यकार पिटर, किरणा आचार्य, सुन्दर गुरुङ, लेखप्रसाद प्याकुरेललगायतले मल्ललाई नेपाली साहित्यको अमूल्य सम्पदा भनी स्मरण गरे ।

नेपाल प्रज्ञा प्रतिष्ठानका पूर्व सदस्य सचिव रेग्मीले भने, “स्वर्गीय मल्लको सम्पूर्ण कृतिलाई एकै ठाउँमा समेटेर संरक्षण गर्नु आजको आवश्यकता हो । उहाँले पु¥याएको योगदानलाई नयाँ पुस्ताले पनि आत्मसात् गर्न सक्नुपर्छ ।’’

पुरस्कृत डा. तिमिल्सिनाले पुरस्कार ग्रहण गर्दै यो सम्मान आफूलाई थप सिर्जनशील बन्न प्रेरणा दिने बताए । उनले भने, “साहित्यको यात्रा निरन्तर छ । स्वर्गीय मल्लजस्ता मूर्धन्य स्रष्टाको नाममा प्रदान गरिएको यो पुरस्कार मेरो लागि अभूतपूर्व प्रेरणा हो ।’’