खोज

नेपालगञ्ज ।

बाँकेका पत्रकार तथा उद्मोगी ब्यावसायीले समाजमा सकारात्मक परिवर्तन ल्याउने विषयमा सहकार्य गर्ने सहमति गरेका छन् । शुक्रवार नेपालगञ्जमा आयोजित ‘मिडिया र निजी क्षेत्र : सहकार्य र सम्बन्ध’ विषयक अन्तरक्रिया कार्यक्रममा यस्तो सहमति भएको हो ।

नेपाल पत्रकार महासंघ बाँकेको आयोजनामा र नेपालगञ्ज उद्योग वाणिज्य संघको सहकार्यमा आयोजित उक्त कार्यक्रममा मिडिया र निजी व्यवसायबीचको आपसी समझदारी, सहकार्य र सशक्त सम्बन्ध निर्माणका लागि सार्थक छलफल तथा प्रतिबद्धताहरु प्रस्तुत गरिएको थियो । पत्रकार र व्यवसायीबीच विश्वासको वातावरण सृजना गर्दै दुई पक्षीय सहकार्यलाई दीगो बनाउन आग्रह गरिएको थियो।

उक्त अवसरमा नेपाल पत्रकार महासंघ बाँकेका अध्यक्ष नविन गिरी र नेपालगञ्ज उद्योग वाणिज्य संघ बाँकेका अध्यक्ष टंकबहादुर थामीले संयुक्त रूपमा सहकार्यका लागि प्रतिबद्धता जनाउँदै ८ बुँदे सहमति–प्रस्ताव सार्वजनिक गरेका थिए । ती प्रस्तावहरूमा उद्योग व्यवसाय र मिडियाबीच परस्पर समन्वय अपरिहार्य भएकोले दुबै क्षेत्रको योगदानलाई सकारात्मक ढंगले प्रस्तुत गर्ने, स्थानीय उत्पादन, पर्यटन, रोजगारी तथा बजार विस्तारका लागि पत्रकारले प्रवर्द्धन गर्ने र व्यवसायीले मिडियालाई आवश्यक जानकारी उपलब्ध गराउने, विपद्, संकट वा आपतकालीन अवस्थामा मिडिया र व्यवसायीबीच सहकार्य गरी समस्या समाधानमा संयुक्त प्रयास गर्ने लगायतका बुँदाहरू समेटिएका छन् ।

साथै मिडियामा विज्ञापन, जानकारी र सूचना प्रवाहलाई व्यवस्थित गर्ने विषयमा संयुक्त सहकार्यको प्रतिबद्धता जनाइएको। कार्यक्रमको अन्त्यतिर नेपाल पत्रकार महासंघ बाँकेका अध्यक्ष गिरी र नेपालगञ्ज उद्योग वाणिज्य संघका अध्यक्ष थामीले दुबै संस्थाको तर्फबाट हस्ताक्षर गर्दै सहमतिको पत्र सार्वजनिक गरेका थिए। उनीहरूले मिडिया र निजी क्षेत्रबीच पारस्परिक विश्वास, सम्मान र दीगो सहकार्यको खाँचो रहेको बताए ।

कार्यक्रममा पत्रकार, व्यवसायी, उद्योगी, होटल व्यवसायी, सेवा प्रदायक, टेलिभिजन, रेडियो, अनलाइन तथा छापा माध्यमका प्रतिनिधिहरूको उल्लेखनीय सहभागिता थियो। उपस्थित वक्ताहरूले मिडिया र व्यवसायीबीचको सम्बन्धले सामाजिक र आर्थिक विकासमा टेवा पुर्‍याउने कुरामा जोड दिएका थिए । दुबै पक्षबीच भविष्यमा नियमित संवाद र सहकार्य कायम गरिने प्रतिबद्धता जनाइएकाले यो कार्यक्रम स्थानीय विकास र सूचना प्रवाहमा एक कोशेढुंगा सावित हुने अपेक्षा गरिएको छ।