खोज

नेपालगञ्ज , १० साउन ।

बाँकेको राप्ती सोनारी गाउँपालिकामा पोषणमैत्री स्थानीय शासनको अवधारणा तथा कार्यान्वयनका चरणहरूबारे आज अभिमुखिकरण कार्यक्रम गरिएको छ ।

पोषणलाई स्थानीय शासन प्रणालीमा कसरी एकीकृत गर्न सकिन्छ भन्ने विषयमा स्पष्ट मार्गदर्शन प्रदान गर्ने उद्देश्यले प्रक्रियागत कार्य कार्यान्वयनकालागि अवलम्बन तथा घोषणा प्रक्रिया सम्बन्धी गाउँपालिका स्तरीय नीतिगत अभिमुखिकरण कार्यक्रम गरिएको हो ।

राप्ती सोनारी गाउँपालिकाले आयोजना गरेको कार्यक्रममा संघीय मामिला तथा सामान्य प्रशासन मन्त्रालयका प्रतिनिधि तथा पोषणमैत्री राष्ट्रिय सहजकर्ताका रूपमा विष्णु प्रसाद चौबे र सोही मन्त्रालयका उपसचिव रेशम कँडेलले सहजीकरण गरे । उनीहरूले पोषणमैत्री स्थानीय शासनको अवधारणा, यसको कार्यान्वयनका चरणहरू, स्थानीय तहमा अपनाउनुपर्ने नीतिगत र प्रक्रियागत उपायहरूबारे प्रस्तुति दिए । कार्यक्रममा बोल्दै राप्ती सोनारी गाउँपालिका अध्यक्ष तप्त बहादुर पौडेलले पोषणलाई स्थानीय विकासको आधारका रूपमा लिएर गाउँपालिका अघि बढ्ने प्रतिवद्धता जनाए । उनले भने, “हामी नीतिगत रूपमा पोषणमैत्री शासनको आधार तयार गर्दैछौं, अब कार्यान्वयनमा ध्यान केन्द्रित गर्न जरुरी छ ।’’

कार्यक्रममा सहभागी विभिन्न सरोकारवाला निकायका प्रतिनिधिहरूले पोषणसँग सम्बन्धित समस्या, समाधान र स्थानीय सन्दर्भमा प्रभावकारी रणनीतिका बारेमा आ–आफ्नो धारणा राखेका थिए । बालबालिका, महिला, किशोरी र दुर्गम बस्तीका पोषण अवस्था सुधार गर्न स्थानीय तहको नीतिगत प्रतिबद्धता र बहुपक्षीय सहकार्य अपरिहार्य रहेको उनीहरूको भनाई थियो ।

सहजीकरणका क्रममा विष्णु प्रसाद चौबेले नेपाल सरकारको पोषणमैत्री स्थानीय शासनसम्बन्धी मार्गदर्शिका, कार्यान्वयन रणनीति र अनुगमन विधिबारे विस्तृत जानकारी दिए । उनले स्थानीय तहमार्फत पोषण सुधारका कार्यक्रमहरू समावेश गर्दा दीर्घकालीन र दिगो परिणाम प्राप्त गर्न सकिने उल्लेख गरे ।

यसैगरी कार्यक्रममा गाउँपालिका उपाध्यक्ष मनिषा सिंह थारुले महिला, बालबालिका र सबै नागरिकको पोषण सुधार गर्ने गाउँपालिकाको साझा उद्देश्य रहेको बताए । गाउँपालिकाले आगामी दिनमा पोषणमैत्री स्थानीय शासन घोषणा गर्ने दिशामा ठोस कदम चाल्ने उनले बताए । अभिमुखिकरण कार्यक्रमले पोषणको महत्व र त्यसलाई स्थानीय शासनको संरचनाभित्र कसरी संस्थागत गर्ने भन्नेबारे गहिरो समझदारी कायम गरेको कार्यक्रमका सहभागीहरुले प्रतिक्रिया दिएका छन् ।

कार्यक्रमले नीति, योजना र कार्यान्वयनको समन्वयमा टेवा पु¥याउने स्थानीय जनप्रतनिधिहरुले विश्वास व्यक्त गरेका छन् । कार्यक्रममा गाउँपालिकाका अध्यक्ष, उपाध्यक्षसहित कार्यपालिका सदस्यहरू, गाउँपालिकाका सम्पूर्ण विषयगत शाखा प्रमुखहरू, ९ वटै वडाका वडाध्यक्षहरू, वडासचिवहरू, स्वास्थ्य चौकीका प्रमुखहरू, विद्यालयका प्रधानाध्यापकहरू, महिला स्वास्थ्य स्वयंसेविकाहरू, बाल समूह सञ्जालका बालबालिका, महिला सहकारीका अध्यक्षहरू, टोल विकास संस्थाका संयोजकहरू, इलाका प्रहरी कार्यालय कुसुम र बैजापुरका प्रहरी ईन्चार्जहरू तथा विभिन्न राजनीतिक दलका प्रतिनिधिहरूको उल्लेखनीय सहभागिता रहेको थियो ।