खोज

नेपालगञ्ज, ९ साउन ।

साउन महिनाको पवित्र अवसरमा भारतको उत्तरप्रदेशबाट हजारौं भक्तजनहरु बिहीवार नेपालगञ्जको वागेश्वरी मन्दिरमा दर्शन गरेका छन् । भारत उत्तर प्रदेश राज्य अन्तर्गत नानपारा तहसीलबाट करिब तीन हजार कावड यात्रीहरू नेपालगञ्जको बागेश्वरी मन्दिर परिसरभित्र अवस्थित खडेश्वर जुंगे महादेवलाई मैत्री जल अर्पण गर्नुका साथै मन्दिर दर्शन गरेका हुन् । कावड यात्रीहरूले सरयू नदीको तट शिवपुर तकिया घाटबाट पवित्र जल संकलन गरी सयौं किलोमिटर लामो पैदल यात्रा गर्दै नेपालगञ्जको वागेश्वरी मन्दिरमा पूजा–अर्चना गरेर विहिवार दिउँसो भारत फर्किएका छन् । यो धार्मिक यात्राले भारत–नेपालबीचको धार्मिक, सांस्कृतिक र मैत्रीपूर्ण सम्बन्धलाई अझ प्रगाढ बनाएको देखिन्छ ।

नवयुवक कावरिया संघ, नानपारा भारतका तहसील अध्यक्ष कुंवर बद्रीनाथ प्रताप सिंहको नेतृत्वमा आएको टोलीले बागेश्वरी मन्दिरमा खडेश्वर महादेवको विशेष पूजा गरेर जल चढाएको थियो । “यस यात्राले हाम्रो साझा धार्मिक परम्परा र आपसी विश्वासलाई बलियो बनाउने विश्वास लिएको छु,” कावड यात्रुको नेतृत्व गरेर आएका सिंहले भने ।

बागेश्वरी गुठी व्यवस्थापन समितिका कार्यालय प्रमुख राजु केसीका अनुसार मन्दिर परिसरमा हजारौं यात्रुहरूको आगमनलाई सहज बनाउन विशेष व्यवस्था मिलाइएको थियो । “नेपालगञ्ज र भारतबीचको यस्तो भावनात्मक र अध्यात्मिक सम्बन्ध जोगाइराख्न यस्ता यात्राहरू अनिवार्य छन्,” गुठी समितिका कार्यालय प्रमुख केसीले बताए । उनका अनुसार यात्रुहरूको सहजता सुनिश्चित गर्न सम्पूर्ण तयारी गरिएको थियो । सुरक्षाकर्मी, स्वयंसेवक र धार्मिक संस्थाहरूको समन्वयमा यात्रुहरूको आगमनदेखि पूजाआजासम्म सबै पक्षको व्यवस्थापन चुस्त देखिएको थियो । भजन–कीर्तन, मन्त्र उच्चारण, धूप–दीप प्रज्वलनले मन्दिर क्षेत्रलाई पूर्णरूपमा आध्यात्मिक वातावरणमा ढालेको थियो । यस्तो दृश्यले भगवान शिवको प्रत्यक्ष उपस्थितिको आभास दिलाएको स्थानीय भक्तजनहरु बताए ।

नेपालगञ्ज र आसपास क्षेत्रका धार्मिक अगुवा, स्थानीय संघ–संस्थाहरू तथा व्यवसायीहरूले यात्रुहरूको स्वागतमा विशेष तत्परता देखाएका थिए । बागेश्वरी मन्दिरको धार्मिक महत्व र यात्रुहरूको भावनात्मक आस्थाले नेपालगञ्जलाई धार्मिक पर्यटनको महत्वपूर्ण केन्द्र बनाउने स्पष्ट संकेत देखिएको नेपाल एशोसिएसन अफ टुर एण्ड ट्राभल एजेन्ट्स (नाट्टा), बाँके च्याप्टरका अध्यक्ष श्रीराम सिक्देल बताए । धार्मिक पर्यटनले आर्थिक गतिविधिमा प्रत्यक्ष योगदान पुर्याउने भएकाले यस्ता कार्यक्रमहरूलाई निरन्तरता दिनु जरुरी रहेको अध्यक्ष सिक्देलको भनाइ छ ।

यसपालिको यात्रा विशेष थियो । एकातिर हजारौं भक्तहरूको एकैपटक आगमन, अर्कोतिर “मैत्री जल” को अवधारणा । यो प्रतीकात्मक जल अर्पणले केवल शिवजीप्रति आस्था मात्रै होइन, दुई देशबीचको साझा धार्मिक र सांस्कृतिक भावनालाई समर्पण गरिएको सन्देश दिएको स्थानीयहरको भनाई छ । कावड यात्राले दुई देशबीचको धार्मिक सहिष्णुता, सांस्कृतिक आदानप्रदान र आपसी मित्रताको गहिरो सन्देश दिएको नागरिक सरोकार मञ्च बाँकेका संयोजक कृष्ण प्रसाद श्रेष्ठले बताए ।