खोज

काठमाडौँ ।

प्रतिनिधिसभाको शुक्रबारको बैठक साउन १९ गतेसम्मका लागि स्थगित गरिएको छ। सभामुख देवराज घिमिरेले बैठक स्थगनको घोषणा गर्दै अब संसद् आगामी साउन १९ गते दिउँसो १ बजे बस्ने जानकारी दिए।

बैठकमा तिलगंगा नेत्र विश्वविद्यालय विधेयक, २०८१ माथि विचार गरियोस् भन्ने प्रस्ताव स्वीकृत गरिएको छ।

त्यसैगरी, संघीय निजामती सेवा विधेयक, २०८० को प्रतिवेदनमा त्रुटि भएको भनी गठन गरिएको संसदीय छानबिन विशेष समितिको कार्यकाल पनि ७ दिनका लागि थप गरिएको छ।

समितिको म्याद आइतबारसम्म सीमित रहेकामा थप समय दिइएको हो, जसअनुसार समितिले साउन २६ गतेसम्म काम गर्न पाउनेछ।

यसै बैठकमा नेपाली कांग्रेसका चार जना सांसदहरूको विषयगत समिति हेरफेरसम्बन्धी प्रस्ताव सभामुखले पेस गरेका थिए, जसलाई सभाले सर्वसम्मतिले अनुमोदन गर्‍यो।

तदनुसार, दिक्पालकुमार शाही कृषि, सहकारी तथा प्राकृतिक स्रोत समितिबाट महिला तथा सामाजिक मामिला समितिमा गएका छन् भने विष्णुकुमार कार्की पूर्वाधार विकास समितिमा सरुवा भएका छन्।

प्रतिमा गौतम अब कृषि, सहकारी तथा प्राकृतिक स्रोत समितिमा रहनेछिन्, र आशा बिक पनि यही समितिमा सरुवा भएकी छन्।

बैठकमा भएका निर्णयहरूले संसद्को कार्ययोजना केही समयका लागि स्थगन भए पनि विधेयक र छानबिन प्रक्रियालाई निरन्तरता दिएको देखिन्छ।