खोज

काठमान्डौँ, ८ साउन।

रूसको सुदूर पूर्वी साइबेरियामा ४९ जना सवार एक यात्रुवाहक विमान दुर्घटनाग्रस्त भएको छ। स्थानीय समाचार एजेन्सीहरूका अनुसार, दुर्घटनास्थलमा कोही पनि जीवित फेला नपरेको पुष्टि भएको छ।

रूसको नागरिक सुरक्षा, आपतकालीन अवस्था तथा विपद् व्यवस्थापन मन्त्रालयले बिहीबार जानकारी दिएअनुसार, ‘अंगारा एयरलाइन्स’ द्वारा सञ्चालनमा रहेको एन्टोनोभ एन–२४ विमान चीनसँग सिमाना जोडिएको अमुर क्षेत्रको टिन्डा सहरमा अवतरण गर्ने क्रममा राडारबाट सम्पर्कविहीन भएको थियो।

दुर्घटनास्थलमा विमानको भग्नावशेष जलिरहेको अवस्थामा फेला पारेको रूसी उद्धारकर्मीहरूले जानकारी दिएका छन । इन्टरफ्याक्स समाचार एजेन्सीका अनुसार, टुक्रा–टुक्रा भएको विमान अमुर क्षेत्रमै भेटिएको हो।

नागरिक उड्डयन प्राधिकरण (रोसाभियात्सिया) द्वारा परिचालित एमआई–८ हेलिकप्टरले दुर्घटनाग्रस्त विमानको जलिरहेको भग्नावशेष देखेको रूसी आपतकालीन मन्त्रालयले टेलिग्राममार्फत पुष्टि गरेको छ ।

टास समाचार एजेन्सीले उद्धृत गरेअनुसार, कम भिजिबिलिटी भएको बेला अवतरणको प्रयास गर्दा चालक दलबाट त्रुटि भएको हुनसक्ने प्रारम्भिक अनुमान गरिएको छ।

दुर्घटनाग्रस्त विमानमा ५ जना बालबालिकासहित ४३ जना यात्रु र ६ जना चालक दलका सदस्य सवार थिए। यद्यपि, रूसी आपतकालीन मन्त्रालयले प्रारम्भिक तथ्यांकमा सवार यात्रुहरूको संख्या करिब ४० रहेको पनि उल्लेख गरेको छ।

रूसका दुर्गम क्षेत्रहरू, विशेषतः आर्कटिक र सुदूर पूर्वी भूभागहरूमा मौसम अत्यन्त प्रतिकूल हुने भएकाले हवाई यात्रा अझै जोखिमपूर्ण मानिन्छ। पछिल्ला वर्षहरूमा उड्डयन सुरक्षामा सुधार आए पनि ती क्षेत्रमा प्रयोग भइरहेका पुराना विमानहरू अझै दुर्घटनामा पर्ने गरेका छन्।

यसअघि, सन् २०२१ मा पनि रूसकै सुदूर पूर्वी क्षेत्रमा एन्टोनोभ एन–२६ विमान दुर्घटना हुँदा ६ जनाको मृत्यु भएको थियो। सोही वर्षको जुलाईमा कामचाट्का क्षेत्रमा भएको अर्को दुर्घटनामा विमानमा सवार सबै २८ जनाले ज्यान गुमाएका थिए।