खोज

लमही, ७ साउन

विभिन्न २० वटा लघुवित्त वित्तीय संस्थाका २६ शाखा कार्यालयले अराजक गतिविधिमा संलग्न व्यक्ति तथा समूहमाथि कडा कारबाहीको माग गर्दै इलाका प्रशासन कार्यालय लमहीमा ज्ञापनपत्र बुझाएका छन्।

साउन २ गते,लघुवित्त वित्तीय संस्था विरुद्धको संघर्ष समितिको नाममा केही अराजक व्यक्तिको समूहले दाङको गढवा स्थित एनआईसी एशिया लघुवित्त वित्तीय संस्था लिमिटेड र निर्धन उत्थान लघुवित्त वित्तीय संस्था लिमिटेडका शाखा कार्यालयमा जबरजस्ती प्रवेश गरी कार्यालयको बोर्ड च्यात्ने, तोडफोड गर्ने र तालाबन्दीको प्रयास गरेको पाइएको हो ।

त्यति मात्रै नभई कर्मचारीमाथि हातपात र डरधम्की दिने जस्ता आपराधिक गतिविधि गरेको गम्भीर आरोप लगाइएको छ। यस्ता कार्यहरूविरुद्ध गम्भीर आपत्ति जनाउँदै लघुवित्त समूहले ईलाका प्रशासन कार्यालय लमहीका कार्यालय प्रमुख अनिल रिजाललाई उक्त ज्ञापन पत्र बुझाइएको हो ।

यस्ता अराजक गतिविधिका कारण घरदैलो सेवा प्रवाहमा अवरोध भएको, कर्मचारीहरू असुरक्षित महसुस गर्न थालेको र त्रासपूर्ण वातावरणमा काम गर्नुपर्ने अवस्था सिर्जना भएको ज्ञापन पत्रमा उल्लेख गरिएको छ।

नेपाल सरकारद्वारा जारी ‘आवश्यक सेवा सञ्चालन ऐन २०१४’ अन्तर्गत समावेश बैंकिङ सेवा जस्तो अत्यावश्यक क्षेत्रमा यस्ता आपराधिक गतिविधि दोहोरिनु गम्भीर विषय भएको भन्दै समूहले यथाशीघ्र दोषीहरू पहिचान गरी कारबाही गर्न माग गरेका छन्।

ज्ञापनपत्र बुझाउने क्रममा लघुवित्त संस्थाका प्रतिनिधिसँगै साङ्ग्रीला डेभलपमेन्ट बैंक, लमहीका कर्मचारीहरूको पनि उपस्थिति रहेको थियो।

शाखा प्रमुख सन्तोष पोख्रेलले शान्ति–सुरक्षा कायम गर्दै नागरिकलाई सहज रुपमा वित्तीय सेवा प्रदान गर्न सहयोग गर्न सम्पूर्ण सरोकारवाला निकायहरूसमक्ष अनुरोध गरेका छन्।

लघुवित्त संस्थाहरूले यस्तो अमानवीय र हिंसात्मक गतिविधि प्रति घोर भर्त्सना गर्दै सरकार र सुरक्षा निकायसँग कडा कदम चाल्न आग्रह गरेका छन्।