खोज

सुर्खेत, ७ साउन ।

सुर्खेतको वीरेन्द्रनगरमा बोलेरो गाडीको ठक्करबाट एक व्यक्तिको मृत्यु भएको छ भने अर्की एक महिला घाइते भएकी छन्।

मृत्यु हुनेमा वीरेन्द्रनगर नगरपालिका–११, धुलियाबिट निवासी ३४ वर्षीय प्रेम बुढा रहेका छन्। जिल्ला प्रहरी कार्यालय सुर्खेतका अनुसार घाँस झार्ने क्रममा सडक छेउमा रहेका उनलाई तीव्र गतिमा आइरहेको कर्णाली प्रदेश ०२००१ च ०९४४ नम्बरको बोलेरो गाडीले ठक्कर दिएको हो।

घटनामा गम्भीर घाइते भएका बुढालाई तत्काल उद्धार गरी उपचारका लागि अस्पताल पु¥याइएको थियो, तर पेट र टाउकोमा गहिरो चोट लागेका कारण उपचारकै क्रममा मृत्यु भएको प्रहरीले जनाएको छ।

उक्त दुर्घटनामा सोही ठाउँकी ३२ वर्षीया तिलकुमारी बुढा पनि घाइते भएकी छन्। उनको खुट्टामा चोट लागेको र अवस्था मध्यम रहेकाले प्राथमिक उपचारपछि अस्पतालबाट डिस्चार्ज गरिएको प्रहरीको भनाइ छ।

बोलेरो गाडी लेकबेशी नगरपालिका–६ का २१ वर्षीय चालक यामलाल सुनारले चलाएका थिए। प्रहरीका अनुसार तीव्र गतिमा गाडी चलाउँदै गुमीबाट वीरेन्द्रनगरतर्फ आउँदै गर्दा उनले सवारी नियन्त्रण गुमाउँदै ठक्कर दिएको प्रारम्भिक अनुसन्धानबाट खुलेको छ।

चालकलाई नियन्त्रणमा लिएर थप अनुसन्धान भइरहेको जिल्ला प्रहरी कार्यालयका प्रवक्ता मोहनजंग बुढाथोकीले जानकारी दिएका छन्।