खोज

सैनामैना, ७ साउन ।

रूपन्देहीको प्रसिद्ध धार्मिक स्थल पर्रोहा बोलबमधाममा शिव भगवानका वाहन नन्दी भगवानको मूर्तिको प्राण प्रतिष्ठा गरिएको छ । नेपाल सरकारका उपप्रधान तथा अर्थमन्त्री विष्णु पौडेलले बुधबार विशेष पूजा समारोहका बीच नन्दी भगवानको प्राण प्रतिष्ठा गरेका हुन्।

धाममा सात दिनसम्म सञ्चालन भएका विभिन्न धार्मिक अनुष्ठानहरूको समापनसँगै यो प्रमुख कार्यक्रम आयोजना गरिएको हो।

कार्यक्रममा बोल्दै अर्थमन्त्री पौडेलले पर्रोहा बोलबमधामलाई व्यवस्थित, आकर्षक र अन्तर्राष्ट्रिय स्तरको धार्मिक तथा पर्यटकीय स्थलको रूपमा विकास गर्नुपर्ने आवश्यकता औंल्याए । “धामको ऐतिहासिक र धार्मिक महत्व छ, तर संरचनागत अवस्था त्यो स्तरको थिएन,” मन्त्री पौडेलले भने ।

उनका अनुसार स्थानीय गुरुजन, भक्तजन, राजनीतिक प्रतिनिधि तथा नगरवासीहरूसँगको छलफलपछि मुख्य मन्दिरको संरचना निर्माणका लागि गुरुयोजना तयार गरिएको हो। पहिलो चरणमा मूल मन्दिरको सौन्दर्यकरण तथा संरचना निर्माण कार्य सम्पन्न भइसकेको छ भने आगामी चरणका कामका लागि बजेट व्यवस्थापन गरिने मन्त्री पौडेलले जानकारी दिए।

सैनामैना नगरको बहुउद्देश्यीय विकास योजना

फरक प्रसंगमा मन्त्री पौडेलले सैनामैना नगरपालिकालाई विकासबाट पछि पर्न नदिने प्रतिबद्धता व्यक्त गरे । “सैनामैनालाई व्यवस्थित र आधुनिक सहरको रूपमा विकास गर्नु मेरो र यहाँका जनताको साझा सपना हो,” उनले भने।

उनका अनुसार यो वर्षदेखि कालिरह बहुउद्देश्यीय योजना सुरु हुनेछ, जसको पहिलो चरणमा बाँध निर्माणको काम अघि बढाइनेछ। यस योजनाले नगरको पर्यावरण संरक्षण तथा पर्यटकीय क्षेत्रको विकासमा सहयोग पु¥याउने अपेक्षा गरिएको छ।

मन्दिर निर्माणमा ७ करोड खर्च, थप ७ करोडको आवश्यकता

पर्रोहा बोलबमधामको मूल मन्दिर पशुपतिनाथको ढाँचामा, प्यागोडा शैलीमा निर्माण गरिएको हो। मन्दिर व्यवस्थापन समिति अध्यक्ष चित्रबहादुर कार्कीका अनुसार मन्दिर निर्माणमा संघीय सरकारबाट ५ करोड र सैनामैना नगरपालिकाबाट ३ करोड, गरी कुल ७ करोड रुपैयाँ खर्च भइसकेको छ । बाँकी संरचनाहरूको निर्माणका लागि थप ७ करोड रुपैयाँ लाग्ने अनुमान गरिएको छ र त्यसका लागि संघ, प्रदेश तथा स्थानीय सरकारसँग सहयोगको अपेक्षा गरिएको छ ।

नगरप्रमुख फणेन्द्रप्रसाद शर्माले नगरपालिकाले पर्रोहा बोलबमधामलाई धार्मिक आस्थाको केन्द्रको रूपमा विकास गर्न प्रतिबद्ध रहेको बताए ।

श्रावणी मेला र बोलबम जलार्पण

गुरुपूर्णिमादेखि जनैपूर्णिमासम्म एक महिनासम्म चल्ने श्रावणी मेला र बोलबम जलार्पण पर्व अहिले पनि धाममा जारी छ। भक्तजनहरू नवलपरासीको त्रिवेणी, रूपन्देहीको रामघाट, तनहुँको देवघाट, गुल्मीको रिडी, पाल्पाको राम्दी, काठमाडौँको सुन्दरीजल, पशुपतिनाथ, भारतको हरिद्वार, उत्तर प्रदेश, बिहार आदि स्थानहरूबाट गंगाजल ल्याएर शिवलिंगमा अर्पण गर्ने गर्छन्।

विशेषतः सोमबार र शनिबार हजारौं श्रद्धालुहरूको भीड रहने गरेको छ। धाममा शिव महापुराण, कथा प्रवचन, महारुद्राभिषेक, होम, आरती, भजनकृतन लगायतका धार्मिक तथा सांस्कृतिक कार्यक्रमहरू सञ्चालन भइरहेका छन्।

कार्यक्रम वरिष्ठ उपाध्यक्ष दुलबहादुर थारुको धन्यवाद ज्ञापन र सञ्चारकर्मी कृष्ण भण्डारीको सञ्चालनमा सम्पन्न भएको थियो।