खोज

काठमाडौँ, ६ साउन।

इजरायली आक्रमणका कारण गाजामा दिनप्रतिदिन मानवीय संकट चर्किँदै गएको छ। प्रत्येक दिन सर्वसाधारण नागरिकले ज्यान गुमाउनु परेको छ भने खाद्य संकट र भोकमरीको अवस्था गम्भीर बन्दै गएको छ।

यहीबीच,विश्व स्वास्थ्य सङ्गठन (डब्ल्यूएचओ) ले इजरायली सेनाले गाजाको डेइर अल–बलाह शहरमा रहेको डब्ल्यूएचओ सङ्गठनका कर्मचारीको घर र प्रमुख गोदाममा आक्रमण गरेको आरोप लगाएको छ ।

हिजो भएको हवाई आक्रमणका कारण ती क्षेत्रहरूमा आगलागीसमेत भएको र त्यसले डब्ल्यूएचओका कर्मचारीहरू र उनीहरूको परिवारहरूलाई गम्भीर जोखिममा पारेको बीबीसीले जनाएको छ।

समाचारका अनुसार, इजरायली सुरक्षाकर्मीहरूले डब्ल्यूएचओका पुरुष कर्मचारीहरूको कपडा फुकालेर बन्दुकको नोकमा सोधपुछसमेत गरेका थिए। यद्यपि डब्ल्यूएचओले लगाएको आरोपप्रति इजरायली पक्षले अहिलेसम्म कुनै औपचारिक प्रतिक्रिया दिएको छैन।

यसअघि आइतवार इजरायली डिफेन्स फोर्स (आईडीएफ) ले डेइर अल–बलाहमा बसोबास गर्ने स्थानीयहरूलाई त्यहाँबाट तत्काल क्षेत्र खाली गर्न चेतावनी दिएको थियो। सोमबार इजरायली ट्याङ्करहरू पहिलोपटक उक्त सहरको दक्षिणी तथा पूर्वी क्षेत्रमा प्रवेश गरेका थिए।

गाजामा इजरायली आक्रमण जारी रहँदा अन्तर्राष्ट्रिय मानवीय संस्थाहरूले युद्धविराम र नागरिकहरूको सुरक्षाका लागि आह्वान गरिरहेका छन्।