खोज

दाङ, ०६ साउन ।

दाङका महिला सामूहिक खेतीमा लागेका छन् । घोराही उपमहानगरपालिका–८ कटुकी सेवारमा रहेको जनचेतना महिला कृषक समूहले सामूहिक खेती गरेर आम्दानी गरेका हुन् । समूहकी कोषाध्यक्ष वसन्ती चौधरीका अनुसार समूहमा रहेका २० जनाले सामूहिक खेती गरिरहेका छन् ।

उनले भनिन्, ‘२५ कट्ठा जमिन भाडामा ल्याएर आलु र प्याज खेती गरेका थियौँ, आलु उत्पादन राम्रो भयो र प्याज पनि राम्रो भएको छ, दुई वटा टनेल बनाएर तरकारी खेती गरेका छौँ, कृषि ज्ञान केन्द्र दाङले लक्षित वर्गका लागि बजेट सहयोग गरेको छ ।’

सोही कार्यालयले २० जनालाई रु. २० हजारका दरले बीउ पुँजी सहयोग गरेको उनले बताइन् । समूहमा आबद्ध भएपछि सरकारी कार्यालय र अन्य कार्यालयमा के के कार्यक्रम आउँछन्, त्यसका बारेमा जानकारी हुने गरेको छ, उनले भनिन् ।

समूहका अध्यक्ष देउकुमारी चौधरीले सोही वडामा २५ कट्ठा जमिन भाडामा ल्याएर सामूहिक खेती गरेको बताइन् । सामूहिक खेती गरेको धान बिक्री गरेर ६० हजार, आलु बिक्रीबाट २० हजार, ब्रोकाउली बिक्रीबाट १२ हजार १ सय ५०, तरकारीका बेर्ना बिक्रीबाट ८ हजार ३ सय, काउली बिक्रीबाट ४ हजार ५ सय, प्याजको बेर्ना बिक्रीबाट ३ हजार, गहुँ बिक्रीबाट १२ हजार रुपैयाँ आम्दानी भएको बताइन् ।

समूहमा काम गर्न थालेपछि एक लाख १९ हजार नौ सय ५० रुपैयाँ आम्दानी भैसकेको उनले बताइन् । १५ कुइन्टल प्याज बिक्री गर्न बाँकी रहेको छ । समयमा खेताला नपाइने र जनशक्ति कम भएका बेला सामूहिक खेतीले सहज भएको उनले बताइन् ।

भेटेरिनरी अस्पताल तथा पशु सेवा विज्ञ केन्द्र दाङले बङ्गुर पालनका लागि खोर बनाउन १० लाख बजेट सहयोग गरेको उनले बताइन् । अध्यक्ष चौधरीले समूहका सबै सदस्यले वित्तीय साक्षरता सिकेर बचत गर्न, लगानी गर्न, ऋण व्यवस्थापन गर्न, आम्दानी र खर्चमा योजना बनाउने गरेको बताइन् ।

उनले भनिन् ‘सामूहिक काम गर्दा छिटो र छरितो हुने गरेको छ, खेताला लगाउन नपर्ने सजिलै काम सकिने भएको छ ।’ भेटेरिनरी अस्पताल तथा पशु सेवा विज्ञ केन्द्र दाङका सूचना अधिकारी कृष्ण न्यौपानेले लक्षित वर्गका लागि आएको बजेट महिला समूहलाई दिएको बताए । उनीहरूको आयआर्जनमा टेवा पुराउने उद्देश्यले सहयोग गरेको उनले बताए ।