काठमाडौं, ५ साउन।
सोमबार नेपाली सेयर बजार ११ महिनायताकै उच्च बिन्दुमा पुगेको छ। नेप्से परिसूचक अघिल्लो दिनको तुलनामा २१.७६ अंकले वृद्धि भई २८९२ अंकमा पुगेको हो। यो स्तर गत वर्षको ९ भदौयता पहिलोपटक पुगेको उच्च विन्दु हो, जब नेप्से २८९४ अंकमा थियो।
यद्यपि सेयर कारोबार रकम भने घटेको छ। अघिल्लो दिन २१ अर्ब ४६ करोड रुपैयाँको कारोबार भएकोमा सोमबार १६ अर्ब ३२ करोड रुपैयाँको कारोबार मात्रै भएको छ।
बजारको पूँजीकरण (कुल बजार मूल्य) भने नयाँ उचाइमा पुगेको छ। सोमबारसम्ममा पूँजीकरण ४८ खर्ब २६ अर्ब रुपैयाँ पुगेको छ, जुन नेपाली सेयर बजारको अहिलेसम्मकै उच्च रेकर्ड हो। यसअघि १८ फागुनमा पूँजीकरण ४७ खर्ब ९९ अर्ब रुपैयाँ थियो।
सोमबार १५३ कम्पनीको सेयर मूल्य बढ्दा ९६ वटा कम्पनीको घटेको छ। सबैभन्दा धेरै वृद्धि माइक्रोफाइनान्स समूहमा देखिएको छ, जसमा १.९३ प्रतिशतले सुधार आएको हो।
यस्तै, विकास बैंक १.४२, अन्य समूह १.८४, निर्जीवन बीमा १.२७, बैंकिङ ०.४८, हाइड्रोपावर ०.४६, लगानी ०.३७, उत्पादन तथा प्रशोधन ०.३७, व्यापार ०.४३, होटल तथा पर्यटन ०.३० र जीवन बीमा ०.०२ प्रतिशतले बढेका छन्।
तीन कम्पनीको सेयर मूल्य १० प्रतिशतले बढेको छ—थ्रीस्टार हाइड्रोपावर, ट्रेड टावर र सान्भी इनर्जी। यस्तै, उन्नति सहकार्य लघुवित्तको मूल्य ९.४० र फस्र्ट माइक्रोफाइनान्सको मूल्य ८.९९ प्रतिशतले बढेको छ।
त्यस्तै, तीन कम्पनीको सेयर मूल्य १० प्रतिशतले घटेको छ—ग्रिन डेभलपमेन्ट, सप्तकोशी डेभलपमेन्ट र कर्पोरेट डेभलपमेन्ट बैंक। सिन्धु विकास बैंकको मूल्य पनि ६.३६ प्रतिशतले घटेको छ।
धेरै कारोबार भएका प्रमुख कम्पनीहरूमा नेपाल पुनर्बीमा, हिमालयन रिइन्स्योरेन्स, बुटवल पावर कम्पनी, फस्र्ट माइक्रोफाइनान्स र लुम्बिनी विकास बैंक रहेका छन्।
