खोज

दाङ, ५ साउन।

प्यूठान जिल्ला अदालतले आर्थिक वर्ष २०८१/८२ मा कुल दर्ता भएका मुद्दामध्ये ७० दशमलव ५० प्रतिशत मुद्दा फर्छ्योट गरेको छ। अदालतले ७ सय ९० मुद्दामध्ये ५ सय ५७ मुद्दा टुंग्याउन सफल भएको हो।

आइतबार आयोजित समीक्षा कार्यक्रममा जिल्ला अदालतका स्रेस्तेदार राजेन्द्र कुमार शर्माले अघिल्लो वर्षबाट जिम्मेवारी सरेका २ सय २ मुद्दा र गत वर्ष दर्ता भएका ५ सय ८८ मुद्दा गरी ७ सय ९० मुद्दा रहेकोमा ५ सय ५७ मुद्दा फर्छ्योट भएको जानकारी दिए। बाँकी २ सय ३३ मुद्दा आगामी महिनाभित्र टुंग्याउने लक्ष्य लिइएको उनको भनाइ थियो।

स्रेस्तेदार शर्माका अनुसार, विगत ३ वर्षको तुलनामा यो वर्ष फर्छ्योट दर उल्लेखनीय रह्यो। जिल्ला न्यायाधीश हिरण्य प्रसाद भण्डारीको इजलासबाट मुद्दा दर्ताको अनुपातमा ७० प्रतिशतभन्दा बढी मुद्दा फर्छ्योट भएको उनले बताए।

अदालतमा मुख्यत: जवरजस्ती करणी, कर्तव्य ज्यान, बहुविवाह, लेनदेन, चेक अनादर, सम्बन्ध विच्छेद, अंश बण्डा र मानाचामलसँग सम्बन्धित मुद्दा बढी दर्ता हुने गरेको छ।

अदालतमा रहेका बाँकी मुद्दामध्ये अधिकांश ६ महिनाभित्र टुंग्याउने योजना बनाइएको छ। २ वर्षभन्दा पुराना मुद्दा शून्यमा झारिएको छ।

फैसला कार्यान्वयनतर्फ अदालतले कैदका २ सय १७ वर्ष १० महिना २३ दिन र जरिवानाका २८ लाख ८३ हजार रुपैयाँ असुल गरेको जनाएको छ। हाल कैदका १ हजार २२ वर्ष २२ दिन र जरिवानाका १ करोड ३७ लाख रुपैयाँभन्दा बढी असुल हुन बाँकी रहेको छ।

स्रेस्तेदार शर्माले बाँकी मुद्दा छिटो समाधान गर्ने गरी बार एशोसिएसन तथा सरोकारवाला निकायसँग समन्वय गर्दै वार्षिक कार्ययोजना अनुसार काम अगाडि बढाइने बताए। अदालतले जिम्मेवारी सरेका मुद्दा घटाउँदै लैजाने र सेवा प्रवाह प्रभावकारी बनाउने लक्ष्य लिएको छ।