खोज

गुल्मी, ४ साउन ।

गुल्मीमा गत वैशाखमा चलेको दोस्रो गुल्मी महोत्सवबाट २४ लाख वढी बचत भएको छ । गुल्मी चेम्बर अफ कमर्सले कृषि पर्यटन र उद्योगको व्यापार प्रवद्र्धन गर्न भन्दै गत वैशाख ५ गतेदेखि २० गतेसम्म महोत्सव सञ्चालन गरेको थियो ।

महोत्सवको आयव्यय विवरण सार्वजनिक गर्दै आर्थिक व्यवस्थापन समितिका संयोजक एवं गुल्मी चेम्बर अफ कमर्सका कोषाध्यक्ष युवराज पाण्डेले कुल ६७ लाख ९६२ रुपैयाँको आयव्यय प्रस्तुत गरेका थिए ।

महोत्सवको आम्दानी मध्ये १२ लाख ४९ हजार ८७ रुपैयाँ खातामा रहेको र १२ लाख २५ हजार मेला व्यवस्थापकसँग उठ्न बाँकी रहेको गुल्मी चेम्बर अफ कमर्सका अध्यक्ष दुर्गाप्रसाद पाण्डेले बताए ।

कुल रकम मध्ये विभिन्न शिर्षकमा ४२ लाख २६ हजार ८७५ रुपैया खर्च भएको कोषाध्यक्ष पाण्डेले बताए । महोत्सवमा टिकट, स्टल, रमाइलो मेला र प्रायोजक सहयोगबाट आम्दानी भएको आयोजकले जनाएको छ ।

मेलामा कलाकार, स्टल निर्माण, यातायात÷खाना वास, साउण्ड सिष्टम, सुरक्षा खर्च, प्रचार प्रसार कार्यालय व्यवस्थापन सम्पूर्ण खर्च, मञ्च गेट निर्माण शिर्षकमा खर्च भएको जानकारी गराइएको थियो । महोत्सवमा व्यवस्थापक संस्थाबाट १२ लाख २५ हजार रकम उठन बाँकी रहेको गुल्मी चेम्बर अफ कमर्सका महासचिव यज्ञप्रसाद पन्थीले बताए ।

महोत्सव आयोजकले सोचे अनुसार नै पूर्ण रुपमा सफल भएको र सम्पन्न गर्न सहयोग गर्ने सबैलाई गुल्मी चेम्बर अफ कमर्सका अध्यक्ष दुर्गाप्रसाद पाण्डेले धन्यवाद दिए । १६ दिनसम्म तम्घासको नुनथलामा चलेको महोत्सवमा करिव ११ करोड बढीको आर्थिक कारोवार भएको आयोजकले जनाएको छ ।

तम्घासमा सार्वजनिक स्थलको अभावमा निजी व्यक्तिको जग्गामा महोत्वस गरिएको थियो । महोत्सवका लागि करिब ३०० सय स्टल राखिएको थियो । महोत्सव अवलोकनका लागि करिव ४५ हजारले टिकट काटेको गुल्मी चेम्बर अफ कमर्सका सचिव सूर्य घिमिरेले बताए ।