खोज

नेपालगञ्ज, ५ साउन ।

नेपालगञ्जको ऐतिहासिक शक्ति पीठ बागेश्वरी मन्दिरको पूर्व पट्टी निर्माणाधीन मन्दिरमा जुङ्गे महादेवको मूर्ति प्रतिष्ठापन गरिएको छ ।

साउन महिनाको पहिलो सोमबारको विशेष अवसर पारेर अष्टधातुले निर्मित जुङ्गेश्वर महादेवको मूर्ति प्रतिष्ठापन गरिएको हो । मूर्ति प्रतिष्ठापन गर्ने क्रममा पण्डितहरुको टोलीले वैदिक मन्त्रचारणसहित विधिपूर्वक पूजाआजा गरेका थिए ।

मन्दिरको पूर्वपट्टि निर्माणाधीन नयाँ मन्दिरमा प्रतिष्ठापन गरिएको जुङ्गे महादेवको मूर्तिको पूजा–अर्चना संघीय सांसद डा. धवल शमसेर राणा, नेपालगञ्ज उपमहानगरपालिकाका मेयर प्रशान्त बिष्ट र बागेश्वरी गुठी व्यवस्थापन समितिका अध्यक्ष गोपाल अधिकारीले संयुक्त रूपमा सम्पन्न गरेपछि अन्य भक्तजनले पनि पूजा गरेका थिए ।

साउन सोमबारको विशेष दिनमा सम्पन्न प्रतिष्ठा समारोहमा भक्तजनहरूको उल्लेखनीय उपस्थिति थियो । “हर हर महादेव”को जयघोषले मन्दिर क्षेत्र गुञ्जायमान भएको थियो । श्रद्धालुहरूको आस्था र भक्तिभावले वातावरणलाई आध्यात्मिक बनाएको थियो ।

स्थानीय धार्मिक अभियन्ताहरूले यस प्रतिष्ठालाई ऐतिहासिक ठान्दै साउन महिनाको पहिलो सोमबार नै मूर्ति प्रतिस्थापन हुनु शुभ संयोग भएको बताएका छन् । साथै, बागेश्वरी मन्दिर क्षेत्रलाई धार्मिक पर्यटनको केन्द्र बनाउने दीर्घकालीन लक्ष्यमा यो प्रतिष्ठा महत्त्वपूर्ण पाइला भएको उनीहरूको भनाइ छ । यससँगै जुङ्गे महादेव मन्दिरमा भएको भौतिक संरचना सुधारका कार्यहरू पनि अगाडि बढाइएका छन् । जुङ्गे महादेवको मन्दिरतर्फ जाने पुल विगतदेखि नै कमजोर रहेको गुनासोबीच नेपालगञ्ज उपमहानगरपालिकाले २०७९ चैत २ गते मन्दिर र पुल निर्माणका लागि १ करोड ८ लाख ७३ हजार ८९९ रुपैयाँमा ठेक्का सम्झौता गरेको थियो ।

पुल निर्माणका क्रममा पुरानो जुङ्गे महादेवको मूर्ति निकाल्दा विभिन्न भागमा क्षति पुग्यो । त्यसपछि नयाँ मूर्ति निर्माण गरी अष्टधातुबाट तयार पारिएको महादेवको मूर्तिलाई हाल पुनः प्रतिष्ठा गरिएको हो । नयाँ मूर्ति सार्वजनिक भएपछि सामाजिक सञ्जालमा केही टीकाटिप्पणी भएपनि अब मूर्तिको विधिपूर्वक प्राण प्रतिष्ठा भइसकेकाले दर्शनार्थीहरूका लागि खुला गरिएको छ ।

बागेश्वरी गुठी व्यवस्थापन समितिका अध्यक्ष गोपाल अधिकारीका अनुसार अष्टधातुको नयाँ जुंगे महादेव मूर्ति निर्माणमा झन्डै १५ लाख रुपैयाँ खर्च भएको छ । नेपालगञ्ज उपमहानगरपालिकाले यस क्षेत्रलाई धार्मिक पर्यटनको नयाँ गन्तव्य बनाउन योजना अघि सारेको नगर प्रमुख प्रशान्त विष्टले बताए । धार्मिक चेतना र सांस्कृतिक धरोहर संरक्षणका हिसाबले जुङ्गे महादेव मूर्ति प्रतिष्ठा एक महत्वपूर्ण कोसेढुंगा सावित भएको स्थानीय बासिन्दा तथा धार्मिक अभियन्ताहरूको विश्वास छ ।