खोज

काठमाडौं, ०४ साउन ।

साउदी राजकुमार अल वालिद बिन खालिद बिन तलाल अल साउद, जो विगत दुई दशकदेखि कोमामा थिए, अन्ततः यो संसारबाट बिदा भएका छन्। जीवनको अधिकांश समय एक अचेत शरीरमा बिताएका उनी ‘स्लिपिङ प्रिन्स’का रूपमा चिनिएका थिए  एउटा यस्तो नाम जसले केवल एक व्यक्तिलाई होइन, एउटा कथालाई जनाउँथ्यो; धैर्यता, आस्था र मायाको कथालाई।

राजकुमार वालिदको जीवनको मोड सन् २००५ मा आयो, जब उनी बेलायतको लन्डनमा सैनिक तालिम लिइरहेका थिए। त्यही बेला भएको एउटा सवारी दुर्घटनाले उनको जीवन स्थिर बनायो। मस्तिष्कमा गहिरो चोट, आन्तरिक रक्तस्राव, अनि त्यसपछि कोमा जुन दुई दशकसम्म रह्यो।

चिकित्सकहरूले प्रयास गरे, अमेरिकी र स्पेनिस विज्ञहरूले सबै उपायहरू अपनाए, तर वालिद कहिल्यै पुरानै वालिद बन्न सकेनन्।

यति लामो समय कोमामा रहँदा पनि उनले आफ्नो परिवार र जनताको मनबाट साथ भने पाए। उनका पिता, राजकुमार खालिद, एक पलका लागि पनि छोराबाट टाढा भएनन्। चिकित्सकहरूले जब जीवन रक्षाका यन्त्र हटाउन सुझाए, उनले त्यसलाई अस्वीकार गरे।

छोरा कहिल्यै उठ्नेछ भन्ने आस्था लिएर उनी निरन्तर प्रार्थनामा थिए। कोमामा रहँदा पनि कहिलेकाहीं हुने स-साना शरीरका प्रतिक्रिया आँखा झिम्क्याउने, औंला चलाउने यिनै संकेतले एक बुबाको आशालाई जिवित राख्यो।

उनको मृत्यु सन् २०२५ जुलाई १९ मा साउदी अरबको एक विशेष स्वास्थ्य केन्द्रमा पुष्टि गरियो। यो खबर फैलिएपछि ‘स्लिपिङ प्रिन्स’ सामाजिक सञ्जालमा फेरि एकपटक चर्चामा आए  तर योपटक अन्तिम श्रद्धाञ्जलीको रूपमा। ह्यासट्यागले हजारौं सन्देशहरू बटुल्यो, जसमा राजकुमारप्रति मात्र होइन, एक बुबाको अदम्य प्रेम र धैर्यप्रति पनि सम्मान प्रकट गरिएको थियो।