खोज

गुल्मी, ०४ साउन ।

जिल्लाको धुर्कोटमा एकै दिन एक सय रोपनी खेतमा धान रोपाइँ गरिएको छ । धुर्कोट गाउँपालिका–६ सिस्तुङ्ग फाँट बिहानैदेखि दिनभर खेताला र ठिँगारेले भरिभराउ थियो ।

स्थानीय अगुवा कृषक ५४ वर्षीय मेघनाथ अर्यालले दुई वर्षदेखि आफ्नो खेतको रोपाइँलाई बाजागाजा सहित उत्सवको रूपमा मनाउँदै आएका छन् । कलाकारहरूको बाली र स्थानीय झ्याउरे भाकासँगै र पञ्चेबाजा नाच्नेहरूका कारण खेतमा खेताला र ठिँगारेलाई काम गरेको महसुस नै थिएन ।

अर्यालले बर्सेनि गर्दै आएको रोपाइँ महोत्सवमा हेर्ने र रमाइलो गर्न स्थानीय सरकारका प्रमुखदेखि सरकारी अड्डाका मान्छेहरू यस पटक पनि सिस्तुङ्ग पुगेका थिए । अर्यालले दुई वर्षदेखि व्यक्तिगत लगानीमा सय रोपनी खेतमा धान रोप्दै आएका छन् ।

राष्ट्रिय तथा स्थानीय कलाकारसँगै पञ्चेबाजाको तालमा हेर्न आउनेहरू सिस्तुङ्ग फाँट पुगेका थिए । काम र मनोरञ्जन गर्ने उद्देश्यले रोपाइँलाई महोत्सवको रूपमा अगाडि बढाउन एकै दिन काम गर्ने गरेको कृषक मेघनाथ अर्यालले बताए । पहिले गाउँहरूमा धेरैले बाजासहित रोपाइँ गर्ने चलन भए पनि पछिल्लो समय हराउँदै गएकाले संस्कृति संरक्षणको प्रयास पनि भएको उनले बताए ।

कोरियाको कमाइले बुटवलमा लामो समय बस्दै आएका अर्याल २०७७ सालबाट सहर छोडेर गाउँ फर्किएका हुन । एक करोड लगानी गरेर व्यावसायिक रूपमा भैंसीपालन समेत गर्दै आएका अर्यालले दैनिक १०० लिटर दूध बिक्री गर्दै आएका छन् ।

गत वर्ष पनि एकै दिन एक सय रोपनीमा धान रोपेका अर्यालले मङ्सिरमा ४०० मुरी धान भित्राएका थिए । आफ्नो ७२ रोपनी र लिजको २८ गरेर १०० रोपनी खेतमा अर्यालले रोप्दै आएका छन् ।

एकै दिन रमाइलो गरेर धान रोप्दा भड्किलो भयो भन्नेहरू पनि मङ्सिरमा आँगनमा धानको थुप्रो देखेर छक्क परेको कृषक मेघनाथ अर्यालले बताए । उनले धुर्कोट गाउँपालिका, हेफर प्रोजेक्ट नेपाल र अर्याल आफैले लगानी गरेर अर्याल खाद्यान्न प्रशोधन तथा प्याकेजिङ्ग उद्योग सञ्चालन गर्दै धुर्कोटे चामलको बजारीकरण सुरु गरेका छन् ।

धुर्कोट गाउँपालिका अध्यक्ष भूपाल पोख्रेलले मेघनाथ अर्यालले सबै काम ऊर्जा र उत्साहका साथ गरिरहेको बताए । उनले व्यवहारमा परिणाम पनि देखाएकाले आफूहरूको सहयोग र सद्भाव सधैँ रहेको उनले बताए ।

गाउँका डेढ सय जनालाई एकै दिन जम्मा गर्दा उत्सवसँगै रोजगारी र संस्कृति संरक्षणको कुरा जोडिएको पोख्रेलले बताए । अर्यालको यो नमुना काम देखेर स्थानीयहरू पनि दङ्ग परेका छन् ।