अर्घाखाँची, ०३ साउन ।
जिल्ला प्रहरी कार्यालय अर्घाखाँचीका प्रहरी नायब उपरीक्षक (डिएसपी) चक्रबहादुर मल्लले जिल्लामा शान्ति सुरक्षा र अमन चयन कायम गर्न अर्घाखाँची प्रहरी सफल भएको दाबी गरेका छन् । डिएसपी मल्लले वार्षिक प्रगति विवरण सार्वजनिक गर्दै कानुन कार्यान्वयनका सवालमा कसैसँग सम्झौता नगरी इमानदारीपूर्वक काम गरेको बताए ।
डिएसपी मल्लका अनुसार, अर्घाखाँचीमा एक वर्षको अवधिमा आत्महत्या गरेर मृत्यु हुनेको सङ्ख्या ५० पुगेको छ । आर्थिक वर्ष २०८१/८२ मा झुन्डिएर ४९ जना र विष सेवनबाट १ जना गरी ५० जनाले आत्महत्या गरेका हुन् ।
आत्महत्या गर्नेहरूमा १९ देखि ३० वर्ष उमेर समूहका २५ जना, ३६ देखि ४६ वर्ष समूहका १९ जना र ६० वर्षभन्दा माथिका ६ जना रहेका छन् । आत्महत्याका प्रमुख कारणहरूमा अशिक्षा, गरिबी, सामाजिक सञ्जालको अत्यधिक प्रयोग, वैदेशिक रोजगारी, मानसिक रोग, प्रेममा असफलता लगायत रहेको जिल्ला प्रहरी कार्यालय अर्घाखाँचीले जनाएको छ ।
प्रहरीको सक्रियतामा विभिन्न मुद्दामा फरार ३१ जना प्रतिवादीलाई पक्राउ गरी कारागार चलान गरिएको छ । त्यस्तै, ३ हजार ६८ वटा सवारी कारबाहीबाट रु. ४२ लाख २८ हजार राजस्व सङ्कलन गरिएको छ । बाल विवाह, जुवा, ज्यान मार्ने उद्योग, ठगी, लागू औषध, चोरी लगायतका १६४ वटा मुद्दा दर्ता भएका मध्ये ६४ वटा मुद्दा फर्छ्यौट भएका छन् ।
यस्तै जिल्लामा गत १ वर्षमा पहिरो, हावाहुरी र आगलागीबाट ५९ घर र ३३ वटा गोठमा क्षति पुगेको छ । यस घटनाबाट ३२ वटा चौपाया मरेका छन् भने ३३ घाइते भएका छन् । अर्घाखाँची प्रहरीले १,९३१ स्थानमा जनचेतनामूलक कार्यक्रम, समुदाय प्रहरी साझेदारी कार्यक्रम सञ्चालन गरी ३५ हजार ६७१ जनालाई लाभान्वित बनाएको छ ।
त्यस्तै सडकमा चालक र सहचालकका लागि आँखा परीक्षण शिविर तथा मुख्य सडकहरूमा चेतनामूलक बोर्डहरू राखिएको डिएसपी मल्लले जानकारी दिए ।
‘जनतालाई भरोसा, अपराधीलाई डर हुने ढङ्गबाट मैले काम सुरु गरेँ,’ उनले भने, ‘शान्ति, सुरक्षा र अमन चयन कायम गर्ने कुरामा कुनै पनि कसुर बाँकी नराखी काम गरेकाले अहिलेसम्म आफूलाई एक इमानदार प्रहरी अफिसरको रूपमा स्थापित गराउन सफल भएको छु ।’
सङ्गठनको भरोसा र जनताको विश्वास गुम्न नदिने गरी काम गर्दै आएको जिल्ला प्रहरी कार्यालय अर्घाखाँचीले जनाएको छ ।
२७ मंसिर २०८२, शनिबार
