खोज

कपिलवस्तु, ०३ साउन ।

कपिलवस्तुको तौलिहवाबाट भारतीय सीमा नाका मर्यादपुर जोडिएको सुठौली भन्सारले गत आर्थिक वर्ष २०८१/८२ मा लक्ष्य भन्दा २९ प्रतिशत बढी भन्सार राजश्व असुली गरेको छ ।

२०७५ साल असोज ८ गते मूल भन्सार स्तरोन्नति गरिएको सुठौली भन्सारलाई गत आर्थिक वर्षमा विभागले ८० करोड ७ लाख ७१ हजार भन्सार राजश्व असुलीको लक्ष्य दिएको थियो ।

तर भन्सार कार्यालयले तोकिएको लक्ष्य भन्दा २९ दशमलव ५४ प्रतिशत बढी भन्सार राजश्व असुल गरेको छ । सो आर्थिक वर्षमा सुठौली भन्सारले कुल १ अर्ब ३ करोड ६५ लाख ५८ हजार भन्सार राजश्व असुली गरेको छ ।

सुठौली भन्सार कार्यालयका भन्सार प्रमुख नारायण प्रसाद गैरेले गत आर्थिक वर्षको अवधिमा तोकिएको लक्ष्य भन्दा २९ प्रतिशत बढी भन्सार राजश्व असुल भएको जानकारी दिए ।

गत आर्थिक वर्षको अवधिमा मासिक तोकिएको लक्ष्यमा सबै भन्दा बढी १ सय ९० दशमलव ८८ प्रतिशत भन्सार राजश्व असार महिनामा र सबै भन्दा कम मासिक लक्ष्यको ६८ दशमलव ८४ प्रतिशत भदौ महिनामा भन्सार राजश्व असुली भएको देखिन्छ ।

अघिल्लो आर्थिक वर्ष २०८०/८१ मा भन्सारले तोकिएको भन्सार राजश्व लक्ष्यको ३२ प्रतिशत राजश्व मात्रै असुली गर्न सकेको थियो । भन्सारमा हाल सम्म धर्म काटा नभएकाले हेबि ड्युटी जाँच पास हुन नसकेकोमा अब धर्म काटा निर्माण पुरा भए सँगै सो समस्या हट्ने प्रमुख गैरेले बताए ।

यो भन्सारको अन्तराष्ट्रियस्तरमा लोकेट गर्ने युएनएलओ कोड नभएकाले निर्यातजन्यवस्तु निर्यातमा समस्या हुदाँ भन्सार राजश्व प्रभावित भएको उनले स्पष्ट पारे ।

अहिले पनि सो भन्सारमा जाँच पासमा स्क्यानर नभएकाले प्रयोग हुन नपाएको, भन्सारको आफ्नै स्थायी यार्ड नभएको, भन्सार बिन्दु भन्दा करिब २ किलोमिटरको दुरीमा भन्सार कार्यालय रहेको, भन्सारको पुर्वाधारका लागि पर्याप्त जग्गा नभएको र नयाँ भवन निर्माणका लागी पर्याप्त जग्गाको उपलब्धता नभएको लगायतका समस्या छन् ।

सो समस्याका बिचमा पनि सुठौली भन्सार कार्यालयले गत आर्थिक वर्षको अवधिमा धर्म काटा जडान, यात्रु शाखाको व्यवस्थापन, सेवाग्राहीका लागि सहजता होस भनेर राजश्व सङ्कलन गर्दै आएको प्रभु बैङ्कको काउन्टरलाई यात्रु शाखा सँगै राखेर सञ्चालन, भन्सार यार्डका लागी जग्गा बहालमा लिएर व्यवस्थापन र बर्षौ देखी थुप्रिएका पुराना सवारी साधन तथा मालवस्तुको लिलामका प्रक्रिया सम्पन्न गरेको छ ।

जसका कारण चालु आर्थिक वर्षमा तोकिएको भन्सार राजश्व लक्ष्य बढीको भन्सार राजश्व असुलीको आधार तयार भएको प्रमुख गैरेले बताए । अघिल्लो आर्थिक वर्षमा भने मध्य अवधि सम्म क्वारेनटाइन स्थापना हुन नसक्नु, ३,४ महिना सम्मको अवधि सम्म औद्योगिक कच्चा पदार्थको आयात नहुनु लगायतका कारणले तोकिएको राजश्व लक्ष्यको तुलनामा ३२ प्रतिशत मात्रै राजश्व असुली भएको अवस्था थियो ।

गत आर्थिक वर्षमा भन्सार राजश्व वृद्धिमा क्वारेन्टाईनको स्थापना, फलफूल तरकारी सहित खाद्यान्न र औद्योगिक कच्चा पदार्थको सामाग्री आयातले राजश्व असुलीको लक्ष्य पुरा भएको देखिएको छ ।

भन्सार राजश्व बढ्नका लागि सबै भन्दा बढी सिमेन्टमा प्रयोग हुने खरानी, जिप्सम, कोईला, बिटमिन (अलकत्रा), धान तथा चामल, फलफूल र तरकारी सहितका खाद्यान्न र उपभोग्यवस्तुको आयातबाट भन्सार राजश्व असुली भएको देखिएको सुठौली भन्सारका सूचना अधिकारी नायब सुब्बा भिम बहादुर लामाले जानकारी दिए ।

सुठौली भन्सारलाई २०७५ साल असोज ८ गते मूल भन्सार स्तरोन्नति गरिएको भए पनि अझै पनि न्यूनतम पूर्वाधारको अपुग रहँदै आएको छ । त्यसै गरी भन्सार बिन्दु भन्दा भन्सार कार्यालय २ किलोमिटरको दुरीमा रहेका कारण समेत भन्सार चुहावट नियन्त्रणमा समस्या पर्दै आएको देखिन्छ ।

सुठौली भन्सारले चालु आर्थिक वर्ष २०८२/८३ का लागि गत आर्थिक वर्षको लक्ष्यको तुलनामा ३५ प्रतिशत बढी र असुलीको तुलनामा १० प्रतिशत बढी करिब १ अर्ब १० करोड हाराहारीको भन्सार राजश्व असुलीको लक्ष्य प्राप्त गरेको छ ।