खोज

बुटवल, ३ साउन ।

बुटवल टुडे मिडिया ग्रुपले आगामी आर्थिक वर्ष २०८२/८३ का लागि वार्षिक कार्ययोजना तय गरेको छ ।

दुई दिनसम्म बसेको कार्ययोजना बैठकले बुृटवल टुडेका प्रकाशन बुटवल टुडे दैनिक र बुटवल टुडे डट कमले छोटो समयमै उल्लेख्य सफलता हासिल गरेको ठहर गर्दै चालु वर्षदेखि अनलाइन टेलिभिजन समेत प्रसारण गर्ने र तीनवटै प्रकाशन तथा प्रसारणको कामलाई प्रभावकारी र व्यवस्थित रुपमा अघि बढाउने निर्णय गरेको हो ।

दुई दिने कार्ययोजना बैठकमा लुम्बिनी प्रदेश लेखा नियन्त्रक कार्यालयका प्रमुख दिपक ज्ञवालीले सार्वजनिक वित्तीय क्षेत्रका बारेमा जानकारी दिंदै यसका विभिन्न पाटाहरु, अनियमितता, भ्रष्टाचार जस्ता विषयमा उजागर गर्न आग्रह गरेका थिए ।

त्यस्तै अनलाइन खबरका सहसम्पादक सुदर्शन खतिवडाले विद्यमान अवस्थामा पाठकको रुचि, चाहना, डिजिटल मिडियाले उठाउनुपर्ने विषयवस्तु, अहिले फेरिंदै गएको पत्रकारिताको शैली लगायतका विषयमा सहजीकरण गरेका थिए ।

त्यस्तै सामाजिक सुरक्षा कोष बुटवलका प्रमुख खिम कार्कीले सरकारले ६ वर्षदेखि कार्याैन्वयनमा ल्याएको सामाजिक सुरक्षा कोषमा आवद्ध हुँदाका फाइदा र यसका विभिन्न पक्षहरुबारे जानकारी गराएका थिए ।

त्यसअघि कार्यक्रममा बोल्दै बुटवल टुडे मिडिया ग्रुपका अध्यक्ष हरि पौडेलले संस्थाले मिडियाजगतमा छुट्टै छाप छोड्न सफल भएको भन्दै आगामी दिनमा विद्यमान चुनौतीहरुको सामना गर्ने गरी अघि बढ्न आवश्यक रणनीति अपनाइने बताए ।

त्यस अवसरमा बुटवल टुडे मिडिया ग्रुपका प्रवन्ध सञ्चालक नवराज कुँवरले संस्थाका समग्र नीति तथा व्यवस्थापकीय पक्षहरुबारे जानकारी गराएका थिए भने बुटवल टुडे दैनिकका सम्पादक कृष्ण मल्ल, बुटवल टुडे डट कमका सम्पादक लक्ष्मण पौडेल र बुटवल टुडे टिभीका सम्पादक स्वस्तिक श्रेष्ठले आ–आफ्नो प्रकाशन तथा प्रसारण क्षेत्रका भावी योजनाहरु प्रस्तुत गरेका थिए ।

त्यस्तै कार्यक्रममा बुटवल टुडेका पुर्व सम्पादक एवं नेपाल–अमेरिका पत्रकार संघ (नेजा) का अध्यक्ष सुरज भण्डारीले अहिलेको युगमा पत्रकारिता डिजिटलमैत्री हुनैपर्ने अवस्था आएको भन्दै यसका लागि आफ्नो तर्फबाट सहयोग गर्न तयार रहेको बताए । त्यस्तै बुटवल टुडेका सहसम्पादक विश्वास ढकाल र कृष्ण खनालले संस्थाको शैली तथा विद्यमान समाचारका अवस्थाहरुबारे जानकारी गराएका थिए ।

बैठकमा बुटवल टुडे मिडिया ग्रुपमा आवद्ध विभिन्न जिल्लाका संवाददाता एवं कर्मंचारीहरुको उपस्थिति थियो ।

कार्यक्रमकै अवसरमा गतवर्ष उत्कृष्ट समाचार लेखेको भन्दै डेस्क संवाददाता रिया बस्नेत क्षेत्री, गुल्मी सम्बाददाता जनार्दन घिमिरे र नवलपरासी सम्बाददाता बेचु गौडलाई नगदसहित सम्मान गरिएको थियो ।