खोज

लमही, ०२ साउन ।

राप्ती स्वास्थ्य विज्ञान प्रतिष्ठानलाई रेफरल केन्द्र बनाएर घोराहीवासी बिमितलाई सिधा सेवा लिन अवरोध सिर्जना भएको भन्दै सिनेट सदस्य बलिभद्र रानाले स्वास्थ्य मन्त्रालयमा पुगेर तत्काल निर्णय गर्न आग्रह गरेका छन् ।

स्वास्थ्य मन्त्रालयका सचिव विकास देवकोटालाई भेटेर रानाले घोराही उपमहानगरका ३८ हजार बढी बिमितलाई सिधै सेवा उपलब्ध गराउने गरी प्रतिष्ठानलाई पुनः प्रथम सेवा बिन्दु कायम गर्न माग गरेका हुन् । रानाले हाल निर्माणाधीन नगर अस्पताल पूर्ण सञ्चालनमा नआएसम्मको लागि प्रतिष्ठानलाई अस्थायी रूपमा प्रथम सेवा बिन्दु कायम गर्न वा उपयुक्त सरकारी स्वास्थ्य संस्थालाई विकल्पको रूपमा तोक्न अनुरोध गरेका छन् ।

स्वास्थ्य सचिव देवकोटाले बिमा बोर्डसँग बिहीबारै छलफल गरेर यथाशीघ्र निर्णय गर्ने प्रतिबद्धता व्यक्त गरेका छन् । उनले स्थानीय तहबाट सिफारिस भइसकेको र घोराहीवासीका लागि व्यावहारिक निर्णय आउने विश्वास पनि दिलाएका छन्
स्वास्थ्य बिमा नियमावली २०७५ को संशोधनपछि प्रतिष्ठानलाई प्रथम सेवा बिन्दु हटाएर रेफरल सेन्टर मात्र बनाइएको छ ।

यो निर्णयसँगै साउन १ गतेदेखि बिमितहरूले प्रतिष्ठानमा सिधै उपचार पाउन सक्ने छैनन् । प्रथम सेवा बिन्दु नभएसम्म, बिमितले लमही अस्पताल वा राप्ती प्रादेशिक अस्पताल, तुलसीपुरबाट रेफर भएर मात्र सेवा लिन सक्ने व्यवस्था गरिएको छ ।

हालसम्म घोराही उपमहानगरका कुनै पनि सरकारी स्वास्थ्य संस्था बिमा बोर्डमा आबद्ध छैनन् । बिमा बोर्डले तोकेका मध्ये राप्ती प्रादेशिक अस्पताल र लमही अस्पतालमा मात्र बिमा सेवा उपलब्ध छ । बिमा बोर्ड दाङका अनुसार जिल्लामा ७१ हजार ७१७ जना बिमित छन्, जसमध्ये ३७ हजार २ सय ८ जना घोराही उपमहानगरका छन् ।

बोर्डका अनुसार जिल्लाका महिला स्वास्थ्य स्वयंसेविका, अति गरिब, अपाङ्गता भएका, एचआइभी सङ्क्रमित तथा ज्येष्ठ नागरिकसमेत गरी हजारौँ बिमित छन्, जसले यो निर्णयका कारण स्वास्थ्य सेवा पाउन कठिनाइ भोगिरहेका छन् ।
बिमा बोर्डले आइतबार नै सबै स्थानीय तहलाई पत्राचार गर्दै, नयाँ प्रथम सेवा विन्दु सिफारिस गर्न अनुरोध गरिसकेको छ ।

स्थानीय तहबाट प्रस्ताव आएमा एक महिनाभित्र मापदण्ड पूरा हुने प्रतिबद्धता सहित नयाँ सेवा विन्दु थप्ने निर्णय हुने जनाइएको छ । घोराहीवासी बिमितको सहज उपचारका लागि सिनेट सदस्य रानाको पहलमा मन्त्रालयमा गम्भीर छलफल भएको र सकारात्मक निर्णय आउने सचिव देवकोटाको आश्वासनले घोराहीवासीमा आशाको किरण देखिएको छ ।