खोज

काठमाडौं, २ साउन ।

नेपाल पर्यटन बोर्डले आर्थिक वर्ष २०८२/८३ का लागि १ अर्ब ५९ करोड ९९ लाख ७० हजार रुपैयाँको बजेट स्वीकृत गरेको छ। बोर्डको कार्यकारी समितिको हालै सम्पन्न बैठकले बजेट पारित गरेको हो। बजेट तर्जुमा उपसमितिका संयोजक ऋषिराम भण्डारीका अनुसार सुरक्षित, भरपर्दो र आकर्षक पर्यटकीय गन्तव्य विकास गर्दै अन्तर्राष्ट्रिय पर्यटन समुदायमा नेपालको छवि मजबुत बनाउने उद्देश्यले बजेट र कार्यक्रम तय गरिएको छ।

बोर्डले चालु आवमा पर्यटक आगमन कम्तीमा १५ प्रतिशतले वृद्धि गर्ने लक्ष्य लिएको छ भने समग्र पर्यटन क्षेत्रलाई चलायमान बनाउन विभिन्न योजनाहरू अघि सारिएको छ। प्रमुख कार्यकारी अधिकृत दीपकराज जोशीका अनुसार बजेट पर्यटन व्यवसायको प्रवर्द्धन, विदेशी मुद्रा आर्जन, रोजगारी सृजना र दिगो विकासमा केन्द्रित छ। यस वर्ष नेपाल–आसियन पर्यटन वर्ष २०२६ को प्रवर्द्धन, गुणस्तरीय पर्यटकलाई प्राथमिकता दिने र समग्र पर्यटन आम्दानीमा १५ प्रतिशतले वृद्धि गर्ने लक्ष्य लिइएको छ।

बोर्डले ५० वटा स्रोत बजारमा प्रवर्द्धनात्मक कार्यक्रम सञ्चालन गर्ने, पर्यटन व्यवसायका लागि थप ५ हजार जनशक्ति उत्पादन गर्ने र २५ वटा नयाँ पर्यटकीय पूर्वाधार संरक्षण गर्ने जनाएको छ। कुल बजेटको ७० प्रतिशत अन्तर्राष्ट्रिय बजारीकरणमा खर्च गरिनेछ। भारतबाट सन् २०२४ मा ४ लाखभन्दा बढी पर्यटक आएका कारण दिल्ली वा अन्य प्रमुख सहरमा स्थायी कार्यालय खोल्ने तयारी पनि अन्तिम चरणमा पुगेको छ।

बजेटअनुसार, पर्यटन बजार व्यवस्थापन, जनसम्पर्क, अनुसन्धान, पूर्वाधार विकास, प्रादेशिक कार्यालय स्थापनादेखि विशेष प्रवर्द्धनात्मक कार्यक्रमसम्मका लागि स्पष्ट रकम विनियोजन गरिएको छ। ‘नेपाल: लाइफटाइम एक्सपिरियन्स’ नारालाई आधार मानी विश्वका प्रमुख मेलाहरूमा सहभागिता जनाइनेछ। अमेरिका, चीन, जापान, युरोप, भारत लगायत मुलुकहरूमा प्रवर्द्धन कार्यक्रम सञ्चालन गरिनेछ।

पोखरा ट्राभल मार्ट, पदमार्ग प्रवर्द्धन, साहसिक पर्यटन तालिम, पर्यटक प्रहरी तालिमजस्ता कार्यक्रम सञ्चालन गरिनेछ भने आन्तरिक पर्यटन प्रवर्द्धनका लागि प्रदेश सरकार, स्थानीय तह र निजी क्षेत्रसँग सहकार्य गरिनेछ। सुदूरपश्चिम, कर्णाली र पूर्वी नेपालका नयाँ गन्तव्यलाई प्राथमिकतामा राखिएको छ।

साथै, डिजिटल पूर्वाधार सुदृढीकरण, अनुसन्धान प्रणाली सुधार, विपद् व्यवस्थापन, जलवायु अनुकूलता, र ‘स्मार्ट टुरिज्म नेपाल’ अवधारणाको कार्यान्वयनमार्फत दीगो पर्यटन विकासको आधार तयार पारिने स्पष्ट गरिएको छ। प्रमुख कार्यकारी अधिकृत जोशीका अनुसार, “यो केवल बजेट होइन, नेपालको पर्यटन पुनर्जागरणको खाका हो,” जसले स्थानीय र अन्तर्राष्ट्रिय साझेदारीको माध्यमबाट दीगो र समावेशी पर्यटन विकासलाई गति दिनेछ।