काठमाडौं ।
सम्पत्ति शुद्धीकरण अनुसन्धान विभागले चालु आर्थिक वर्ष २०८१/८२ मा कार्यसम्पादनका दृष्टिले ऐतिहासिक फड्को मारेको छ। विभागका अनुसार, यस आर्थिक वर्षमा मात्र २० वटा मुद्दा विभिन्न जिल्ला अदालतहरूमा दायर गरिएका छन्, जसमा ८० जना व्यक्ति र २१ संस्था विरुद्ध ७८ अर्ब १३ करोड रुपैयाँभन्दा बढीको बिगो माग दाबी गरिएको छ।
यो रकम विभागले विगत १५ वर्षमा दायर गरेका १०१ मुद्दाको करिब पाँच गुणा बढी हो। विभागले २०६६/६७ देखि २०८०/८१ सम्मको अवधिमा १०१ वटा मुद्दामा जम्मा १४ अर्ब रुपैयाँको बिगो दाबी गरेको थियो। यस हिसाबले चालु वर्षको प्रगति ऐतिहासिक मानिएको छ।
उजुरी फर्स्योटमा पनि विभागले उल्लेखनीय प्रगति गरेको छ। अघिल्ला वर्षहरूमा वार्षिक अधिकतम ५६० उजुरी फर्स्योट हुने गरेकोमा चालु आर्थिक वर्षमा हालसम्म ८८० उजुरी फर्स्योट भइसकेको छ। यो संख्या सुरुआतमा बाँकी रहेका उजुरीमध्ये करिब ५० प्रतिशत हो। विभागमा हालसम्म जम्मा ४ हजार ३ उजुरी दर्ता भएका छन्, जसमध्ये २ हजार १५० उजुरी फर्स्योट भइसकेका छन्।
विभागले ४८ अर्ब, ६ अर्ब, ४ अर्ब रुपैयाँ जस्ता ठूला बिगो भएका मुद्दाहरू अनुसन्धानको दायरामा ल्याएको जनाएको छ। बहुमूल्य धातुको अवैध कारोबार, तस्करी, संगठित र अन्तरदेशीय अपराधका घटनाहरूलाई प्राथमिकतामा राखी अनुसन्धान अघि बढाइएको विभागले उल्लेख गरेको छ।
बजेट कार्यान्वयनमा पनि विभागले सन्तोषजनक प्रगति गरेको छ। चालुतर्फ ८६.३१ प्रतिशत र पुँजीगत तर्फ ८१.९९ प्रतिशत बजेट खर्च भइसकेको जनाइएको छ। साथै, विशेष अदालतबाट फैसला भई जफत भएको १ करोड २७ लाखभन्दा बढी रकम सरकारी कोषमा दाखिला गरिएको जानकारी विभागले दिएको छ।
