खोज

दाङ,१ साउन ।

दाङमा भैँसी/ राँगा खरिद गरी पैसा नदिएर ठगी गर्ने व्यक्ति पक्राउ परेका छन् ।  दाङको गढवा गाउँपालिका वडा नं. ४ पर्सा बस्ने  ४४ बर्षको मोहम्मद मिल मुसलमानले मिति २०८०साल माघ २३ गते दाङ दंगिशरण गाउँपालिका वडा नं ४ मुकदेवा बस्ने तेजमान चौधरी समेतका ३ जना व्यक्तिहरूबाट २८०,०००/- (दुई लाख असी हजार रुपैयाँ) बराबरको ३ जोडी (६ वटा) राँगाको मूल्य भन्दा धेरै मूल्य कायम गरी पीडित व्यक्तिहरूलाई प्रलोभनमा पारी उधारोमा राँगा भैँसी खरिद गरी लिई सम्पर्क विहीन भएपछि पीडितहरूले मिति २०८१/०८/२१ गते जिल्ला प्रशासन कार्यालय घोराही दाङमा  मोहम्मद मिल मुसलमानको विरुद्धमा ठगी गरेको भनी उजुरी निवेदन दिएको आधारमा पक्राउ गरिएको प्रहरीले जानकारी दिएको छ ।

ठगी गर्ने  मुसलमानलाई पीडित व्यक्तिहरू मध्येका तेजमान चौधरीले  लमही रातो डाँडा स्थित बाटोमा फेला पारी उधारोमा लिएको राँगाको पैसा दिनुहोस् भनी माग्दा पैसा नदिई तैँले जे गर्न सक्छस् गर, म तैलाई पैसा दिँदैन भनी धकलपकल गरी धाक धम्की देखाई अभद्र व्यवहार गरेको भनी नियमान चौधरीले जिल्ला प्रहरी कार्यालयमा अभद्र व्यवहार कसुरमा किटानी जाहेरी दरखास्त पेस  गरेकोले मुसलमानलाई यही असार ३२ गते  गढ़वा एरियाबाट पक्राउ गरी  जिल्ला प्रहरी कार्यालय घोराही दाङको हिरासत कक्षमा राखी थप अनुसन्धान भइरहेको जिल्ला प्रहरी कार्यालय दाङ प्रहरी नायव उपरीक्षक चक्रबहादुर शाहले जानकारी दिए ।