काठमाडौं, १ साउन ।
भूमि व्यवस्था, सहकारी तथा गरिबी निवारण मन्त्री बलराम अधिकारीले आफूमाथि सार्वजनिक रूपमा आएका अडियो र त्यसमा उठेका विषयहरू आफू र मन्त्रालयसँग कुनैसम्बन्ध नभएको दाबी गरेका छन्।
मन्त्रालयको एकवर्षे उपलब्धि सार्वजनिक गर्न आयोजित पत्रकार सम्मेलनमा मन्त्री अधिकारीले पोखराको एक जग्गा प्रकरणसँग जोडिएको अडियो चर्चामा आएपछि आफू पनि अनाहकमा विवादमा मुछिएको बताए।
उनले स्पष्ट रूपमा भने, “अहिलेसम्म सार्वजनिक भएको अडियोमा प्रयोग भएको भाषा र त्यसमा बोल्ने व्यक्तिहरू हामीसँग सम्बन्धित छैनन्। मेरो स्वर, मेरा शब्द छन् कि छैनन् भन्ने कुरा अडियोले नै स्पष्ट गर्छ।”
अधिकारीले उक्त अडियोलाई चरित्रहत्या गर्न खोजिएको प्रयास भनेर टिप्पणी गरे। उनले भने, “यो शुद्ध चरित्रहत्या गर्ने प्रयास हो। केही व्यक्तिहरूले आफ्नो स्वार्थ पूरा गर्न मालपोत अधिकृतलाई फिर्ता गराउने मनसायले दबाब दिए। मैले त्यसमा सहमति जनाइनँ, त्यसपछि यस्ता कुरा बाहिर ल्याइयो।”
मन्त्री अधिकारीविरुद्ध सार्वजनिक भएको अडियो अहिले सार्वजनिक चासोको विषय बनेको छ, तर उनी स्वयंले त्यसप्रति स्पष्ट अस्वीकार जनाउँदै यो योजनाबद्ध बदनाम गर्ने खेल भएको दाबी गरेका छन्।
